«Գյումրու գազանանոցի հետ կապված աղմուկից հասկացանք, որ օրենսդրական բացեր ունենք»,- այսօր հայտարարեց ՀՀ բնապահպանության նախարար Արամայիս Գրիգորյանը: Դրանից հետո, նախարարությունում աշխատանքային խումբ է ստեղծվել, որն աշխատում է համապատասխան օրենքի նախագծի վրա: ՀՀ Ազգային ժողովի գյուղատնտեսական եւ բնապահպանական հարցերի մշտական հանձնաժողովն էլ այսօր խորհրդարանական լսումներ էր կազմակերպել` «Անազատ և կիսաազատ պայմաններում վայրի կենդանիներին պահելու օրենսդրական կարգավորումը և առկա թերությունները» թեմայով: Հանձնաժողովի նախագահ Մարտուն Գրիգորյանն ասաց, որ նախարարության պատրաստած փաստաթուղթը քննարկվել է ոլորտի հասարակական կազմակերպությունների հետ, քննարկումները դեռ ընթանում են:
Բնապահպանության նախարարի տեղակալ Խաչիկ Հակոբյանը ներկայացրեց նախատեսվող փոփոխությունների փաթեթը: Ըստ այդմ, առաջարկվում է, որպեսզի յուրաքանչյուր ոք, ով վայրի կենդանի տիրապետող է՝ կիսաազատ կամ ազատ պայմաններում, պատասխանատվություն կրի այդ կենդանու համար, տարեկան կտրվածքով որոշի, վճար ներկայացնի: Արդյունքում, կգոյանա համապատասխան դրամագլուխ, որը ռիսկային դեպքերում եւ ֆորսմաժորային իրավիճակներում հայտնված կենդանատեսակների խնդիրներին արագ լուծումների հնարավորություն կտա: Օրենքի գործելուն պես կհայտարարվի խստացման ռեժիմ, կենդանիները կգրանցվեն եւ կհամարակալվեն:
Ինչպե՞ս վարվել այն ֆիզիկական անձանց հետ, ովքեր իրենց ռեստորանային համալիրում, հաճախորդ գրավելու համար, կենդանիներ են պահում`ոչ պատշաճ պայմաններում, խոշտանգում են, անմարդկային վերաբերմունք են դրսեւորում`հարցրեց ԲՀԿ խմբակցության ղեկավար Նաիրա Զոհրաբյանը: «Հասարակական կազմակերպությունները մեզ մոնիտորինգ են ներկայացրել, թե որ ռեստորաններում կան նման բաներ: Ինչ-որ մեկն իր հավեսի համար իր օբյեկտում վանդակ է դրել ու կենդանի է պահել»,- ասաց նա:
Փոխնախարարն ասաց, որ սահմանվելու է թույլտվության կարգ, նաեւ`կենդանիների պահման խիստ կարգ է սահմանվելու, որ խնդիրներ չլինեն:
Կարդացեք նաև
ԲՀԿ խմբակցության պատգամավոր Արմեն Ավետիսյանը հետաքրքրվեց`քրեական պատիժ սահմանվելո՞ւ է: Նաիրա Զոհրաբյանն էլ հավելեց, որ եվրոպական երկրներում անգամ քրեական պատասխանատվություն է սահմանված կենդանուն խոշտանգելու կամ ոչ պատշաճ պահելու համար:
«Վայրի նապաստակի կամ էկզոտիկ այլ կենդանու համար պատիժը պետք է վարչարարության սահմաններում լինի»,- պատասխանեց բնապահպանության փոխնախարարը`նկատելով, որ 200 հազար դրամից ավել տուգանքն արդեն մեխանիկորեն քրեական պատասխանատվության դաշտ է տանում:
ԲՀԿ-ական պատգամավոր Վահագն Մախսուդյանն էլ հետաքրքրվեց. «Գյումրիում այդ մարդուց առգրավվեցին կենդանիները, բայց գնեցի՞ն, թե ի՞նչ արեցին: Խոշտանգել էր`պատժեք, բայց դա իր սեփականությունն էր»: Փոխնախարարը նկատեց, որ Ստեփան Վարդանյանին`Գյումրու գազանանոցի սեփականատիրոջը, ամենախիստ պատժին պետք էր արժանացնել. «Բայց նա սնանկացման գործընթացում էր եւ մենք զերծ մնացինք պատիժներից`կենտրոնանալով կենդանիներին փրկելու վրա»:
Վահագն Մախսուդյանն էլ նկատեց. «Ամոթ էր մեր հանրապետության համար, դիմեցինք, աշխարհով մեկ հայտարարեցինք`եկան այդ կենդանիներին տարան կերակրելու: Այս օրենքը, հուսով եմ, կլուծի նման հարցերը»:
Նելլի ԳՐԻԳՈՐՅԱՆ
