«Հոկտեմբերի 9-ից մինչեւ հիմա մենք հարուցել ենք 4 վարչական վարույթ, որոնցից երկուսն ավարտված են։ Երկու խորհրդատվական որոշում ենք տվել։ Մեկն արդեն հրապարակել ենք, երեխաների անձնական տվյալների պաշտպանությանն էր վերաբերվում որպես ամենախոցելի թեմա։ Իսկ մյուսը վերաբերվում է մի հարցի, որին բոլորս ենք առնչվում»,- Մեդիա նախաձեռնությունների կենտրոնի հրավիրած «Լրադադար» ակումբի «Անձնական տվյալների հրապարակումը մեդիայում» թեմայով քննարկման ընթացքում ասաց Արդարադատության նախարարության Անձնական տվյալների պաշտպանության գործակալության պետ Շուշան Դոյդոյանը։
Նա նշեց, որ այդ դեպքը վերաբերվում է անձնական հեռախոսահամարները գովազդային նպատակներով օգտագործելուն. «Այսօր արդեն մեր այդ խորհրդատվական որոշումը պետք է հրապարակենք, որով մեր դիրքորոշումն ենք հայտնում, Եվրամիության դիրեկտիվներն ենք ներկայացնում, թե ինչպիսի կարգավորումներ կան Եվրամիությունում, մեզ մոտ ինչ կարգավորումներ կան եւ այլն»։
Որպես օրինակ Շուշան Դոյդոյանն առանձնացրեց Xopan.am-ից ստացված հաղորդագրությունները. «Այնտեղ ասվում էր, որ եթե դուք գործազուրկ եք, եկեք Վլադիկավկազ, մեքենայի վերանորոգման գործով զբաղվեք եւ այլն։ Եթե դուք որեւէ կառույցում չեք գրանցել ձեր տվյալները, որ ցանկանում եք հաղորդագրություն ստանալ, դա խախտում է»։
Անձնական տվյալների պաշտպանության գործակալության պետը տեղեկացրեց, որ նման դեպքերի մեղավորները բջջային ծառայություն մատուցող օպերատորներն են. «Բայց կա մի շատ մեծ տոկոս, որոնց հայտնաբերելը շատ դժվար է։ Օրինակ` նույն Xopan.am-ում գրված որեւէ տվյալ այսօր հասանելի չէ։ Հեռախոսն անջատված է, կայքի հասցեն էլ, երբ հավաքում ես, ինչ-որ ռուսական կայքի վրա է գցում։ Կայքն արդեն արգելափակված է, ամենայն հավանականությամբ բարձրացված աղմուկից»։
Կարդացեք նաև
Գործակալության վարչական վարույթների իրականացման բաժնի պետ Գեւորգ Հայրապետյանն էլ նշեց, որ հիմնականում նման բովանդակությամբ նամակների հեղինակներին հնարավոր է լինում գտնել հետադարձ զանգ կատարելու միջոցով. «Հետադարձ զանգ կատարելու դեպքում թվերն են գրվում, հեռախոսի համարն է երեւում ու պարզ է դառնում, թե ով է օպերատորը։ Xopan-ի դեպքում հետ է գնում դեպի Xopan.am։ Թիվ չկա, որ իմանանք ումից ստանանք պահանջը»։
Շուշան Դոյդոյանն ասաց, որ այս տարվա ընթացքում ցանկանում են որոշակի քայլեր ձեռնարկել իրավիճակը կարգավորելու համար. «Օպերատորին ասում ենք, որ իրենց կնքած պայմանագրերում կետ ես ավելացնում, որ բաժանորդը նշի, թե ուզում է արդյոք նման բովանդակությամբ հաղորդագրություններ ստանալ։ Եթե բաժանորդն ասի, որ չի ուզում, նա այլեւս չի ստանա»։
Աշոտ ԻՍՐԱԵԼՅԱՆ
