ՀՀ բարձրագույն որակավորման հանձնաժողովը (ԲՈՀ) կրկին հրապարակել է ԲՈՀ-ում չհաստատված կամ մասնագիտական խորհուրդների կրկնական քննարկման վերադարձված 23 աշխատանքների ցանկը:
Այս տարվա մարտի 16-ի դրությամբ՝ 2 անորակ աշխատանք իրավաբանությունից է, 9 աշխատանք տնտեսագիտության ոլորտից, 1-ը լեզվաբանությունից, 5-ը բժշկությունից, 1-ը կենսաբանությունից եւ 4-ը մանկավարժությունից:
Տնտեսագիտության ոլորտը մշտապես ռեկորդակիր է «խոտանված» աշխատանքների առումով: Եվ դարձյալ սահմանված չափանիշներին չպատասխանող աշխատանքների մեծ մասի հասցեատերը Հայաստանի պետական տնտեսագիտական համալսարանի 014 խորհուրդն է:
Վերջինիս նախագահ, տնտեսագիտության դոկտոր, պրոֆեսոր Յուրի Սուվարյանը մեկ ամիս առաջ «Առավոտին» տված հարցազրույցում այս առիթով դժգոհել էր, թե զուր են բոլորը մեղքը խորհուրդների վրա բարդում: Նա առաջարկել էր դժվարացնել հայցորդ ձեւակերպելու կարգը եւ մուտքը դեպի ասպիրանտուրա: Այլապես, Սուվարյանի ձեւակերպմամբ. « Ինչ կա ընդունում ենք, հետո ընկնում կրակը: Դա տհաճ իրավիճակ է ստեղծում»:
Կարդացեք նաև
Իմիջիայլոց, ԲՈՀ-ի՝ փետրվարի 9-ին հրապարակած «խոտանված» 11 աշխատանքներից 7-ը եւս տնտեսագիտության ոլորտից էին:
Գոհար ՀԱԿՈԲՅԱՆ
