Այսօր «օֆշորի» գործով դատական նիստին Էրեբունի եւ Նուբարաշեն վարչական շրջանների ընդհանուր իրավասության դատարանում խաբեության եւ փողերի լվացման մեջ մեղադրվող Աշոտ Սուքիասյանը ցուցմունք տվեց:
Դատավորը խնդրեց հանգամանալից ներկայացնել կատարվածը, թե ինչպես են ծանոթացել ինքն ու Փայլակ Հայրապետյանը, կառավարական նիստում ովքեր են եղել, երբ ծանոթացել են, ինչ խոսակցություն է եղել, ասում են՝ փողեր եք լվացել, հարկերից եք խուսափել, մանրամասն ներկայացրեք:
Հանգամանալից խոսելը հաշվի առնելով՝ 1 ժամից ավելի Աշոտ Սուքիասյանը միայն պատմեց, թե Աֆրիկայի նախագահի մոտ ինչպես է հյուր եղել, աֆրիկացի պաշտոնյան շաբաթվա որ օրերին է տարազ հագել, ինքը երբ է «դուխովկա» դրած բադ կերել՝ սկսած իր մանկությունից, հոր նկատմամբ հարգանքից: Նա պատմեց, որ հոր մոտ անգամ հաց չի կերել, իսկ հորեղբայրը հոր մոտ չի ծխել, իմացանք անգամ թե քանի կգ է կշռել իր հայրը՝ 150 կգ եւ քանի սմ բոյ ունի՝ 1.90: Ասաց, թե «Արյունոտ ադամանդ» ֆիլմը որտեղ է նկարահանվել, Ջիվան Գասպարյանի դուդուկի տակ ինչպես է ուզեցել պարել իր աֆրիկացի ընկերը եւ նման հանգամանալից բաներ:
Նա պատմեց, թե ինչքան են հարգել արտասահմանյան մեքենաների շարժիչի մասնագետ իր հորը եւ ինչպես է հայրը ստիպել մի մասնագիտություն ձեռք բերել. «Ընտրեցի ադամանդագործության եւ ոսկերչության մասնագիտությունը՝ հատկապես, որ այն միշտ ծառայում է ուրախության»:
Կարդացեք նաև
Հետո պատմեց, թե ինչպես է ինքը սպիտակամորթ լինելով՝ ընկալվել Աֆրիկայում ու սկսել բիզնես դնել, որ իրեն հրավիրել են Ժնեւ՝ այնտեղ բնակվելու, բայց չի ցանկացել արտագաղթել:
Աշոտ Սուքիասյանը ցուցմունքում պատմեց իր երազանքների մասին. «Երազանքներ ունեի, որ հասնեի մի կատարելության, որ ստեղծեի օրիորդաց դպրոցներ, մատուռներ կառուցեի, եկեղեցիներ, այդ նպատակով հողեր էի գնել, կառույցներ: Նույնիսկ գյուղատնտեսություն էի հիմնել, որ ժողովուրդն այդ սնունդով ապրեր: Ծերանոցներ էի մտածում բացել, ծերանոցին կից մանկատուն, որ ծերերը մանուկներից իրենց կարոտն առնեին, մանուկները՝ ծերերից: 21 հազար քմ տարածք էի գնել հենց այդ նպատակով»:
Ի դեպ, դատավորը Աշոտ Սուքիասյանին առաջարկեց, որ գրավոր ցուցմունքը պատրաստի, որ մտքերը հավաք խոսի: Աշոտ Սուքիասյանը պնդեց, որ միշտ պատրաստ է, հազիվ առիթ է ընձեռվել, որ ԶԼՄ-ներով Հայրապետյանի պատմած «խեղաթյուրված» ինֆորմացիան, զրպարտությունները հերքի:
Աշոտ Սուքիասյանի ցուցմունքի «ներածական» մասն ավարտվեց: Նա կանգ առավ այնտեղ, թե ինչպես է վերցրել Փայլակ Հայրապետյանի գույքը, այսինքն, մեղադրանքին:
Հաջորդ դատական նիստը նշանակվեց մարտի 31-ին, ժամը 12.00-ին:
Հռիփսիմե ՋԵԲԵՋՅԱՆ
