Այսօր Տեղեկատվության անվտանգության փորձագետ Սամվել Մարտիրոսյանը լրագրողների հետ զրույցում ասաց, որ վերջերս մեծ աղմուկ բարձրացրած բանկային կիբերհանցագործությունը, երբ հաճախորդների հաշիվներից զգալի գումար են տարել, եղել է ոչ միայն ՎՏԲ-Հայաստան բանկում. «Ես գիտեմ առնվազն 4 բանկ, թեեւ արձագանքել է դրան 1 բանկ: Խնդիրն այն է, որ բանկոմատների վրա հնարավոր է տեղադրել հատուկ սարքեր, ոնց որ կլոնավորում են քարտը: Չարագործը կարող է ձեր քարտի կլոնն ունենալ եւ օգտվել՝ գումար տանել, առեւտուր անել՝ ըստ պահանջի: Այստեղ պրոբլեմը նրանում է, որ Հայաստանում այդ տիպի հարձակումներ չեն եղել մինչ այժմ, հանրությունը տեղյակ չի եղել, որ նման պրոբլեմներ կան, որ կարող է բանկոմատը գողանալ տվյալները: Մարդիկ չգիտեն, թե որ բանկոմատներն են ավելի անվտանգ: Բնականաբար, ավելի անվտանգ են այն բանկոմատները, որոնք բանկի տարածքում են, որովհետեւ վերահսկողություն կա: Մի կողմից մարդիկ իմացան, որ բանկում պրոբլեմ է եղել, բայց չիմացան, թե ինչպես է եղել: Դա նշանակում է, որ շատ հեշտ նույնը կարող է կրկնվել»:
Ըստ Սամվել Մարտիրոսյանի, շատ դրական է, որ ՎՏԲ-Հայաստան բանկը արձագանքեց դրան եւ տեղյակ պահեց քարտապաններին: Մենք ճշտեցինք՝ դա իր գործարար համբավը չվնասե՞ց, սոցցանցերում քննարկվում էր, որ եթե բանկը թեկուզ ինֆորմացիայի նման արտահոսք է թույլ տալիս, որը խուճապ է առաջացնում քարտապանների շրջանում, արդեն այդ բանկին չի կարելի վստահել՝ պարոն Մարտիրոսյանը պատասխանեց. «Չկա այդպիսի կառույց, որտեղից արտահոսք չի լինում: Մենակ քարից արտահոսք չի լինի: Աշխարհում ընդունված մոտեցումը հետեւյալն է՝ արտահոսքը թաքցնելը շատ ավելի մեծ պրոբլեմ է, քան եթե հանրությունը իրազեկվի: Շատ դրական է, որ բանկը տեղեկացրել է վտանգի մասին»:
Սամվել Մարտիրոսյանն ասաց, որ այդ «կլոնավորող» skimer սարքերը կարող են տարբեր բանկոմատների վրա տեղադրվել: Մենք խնդրեցինք պարզ բացատրել, թե ինչպես ստուգել բանկոմատն անվտա՞նգ է, նման սարքեր կա՞ն, թե՞ չկան: Փորձագետը պատասխանեց, որ պաշտպանված բանկոմատների քարտը մտցնելու հատվածն ուռուցիկ է լինում. «Դա հատուկ միջոց է, որ ոչ մի լրացուցիչ սարք հնարավոր չլինի դնել: Սքիմերները տեղադրվում են նաեւ պին կոդը հավաքելու ստեղնաշարի վրա, որը կարող է շարժվել ու կերեւա: Բանկոմատներ կան, որ երկու կողմից սահմանափակող շրջանակ են դնում, որը պաշտպանում է սքիմերից: Մարդիկ կարող են անզեն աչքով տեսնել, որ դա ավելի պաշտպանված բանկոմատ է: Երբ ստեղնաշարը բաց է, ավելի մեծ հնարավորություն կա ինչ-որ բան տեղադրելու»:
Հռիփսիմե ՋԵԲԵՋՅԱՆ
