«Հենց ձեր բերած օրինակի համար` ճիշտ չէ այդ ցուցակների հրապարակումը: Եթե ինչ որ ներկայացնում եք, իրականություն է, աշխատողը կարող է ասել, որ իշխանության ներկայացուցիչը, որը բոլորին դժվար թե դեմքով ճանաչում է, սխալվել է: Հակառակ պարագայում, նա կարող է հանել ցուցակից անունները եւ ուղղակի «Լինչի դատաստան» կտեսնի»,- «Փաստարկ» ակումբում արձագանքելով Aravot.am-ի դիտարկմանը`թե քվեարկածների ցուցակները չհրապարակելը պատճառաբանվում է նաեւ իշխանության ձեռքին դա լրացուցիչ լծակ չդարձնելու փաստով, ասաց ՀՀԿ խմբակցության պատգամավոր Արտակ Դավթյանը, մինչդեռ բոլորիս էլ հայտնի է, որ բոլոր գերատեսչությունների աշխատակիցներին էլ ցուցակներով տանում են քվեարկության, իշխանության ներկայացուցիչն էլ, տվյալ պարագայում, թաղային հեղինակություն որեւէ մեկը, վերահսկում է այդ գործընթացը:
Իշխանական պատգամավորը կարծում է, որ նույն բանը կարող է նաեւ ընդդիմության շրջանում լինել, քանի որ ընդդիմադիրներն էլ համակիրներ ունեն եւ կստացվի, որ ընտրություններից հետո բոլոր բոլորից նեղանալու առիթներ կունենան:
Երեկ խորհրդարանում կայացած Ընտրական օրենսգրքի նախագծի շուրջ լսումներից Արտակ Դավթյանը տպավորություն է ստացել, որ որոշ ընդդիմախոսներ չէին կարդացել նախագիծը կամ հպանցիկ էին անցել վրայով, քանի որ շատ հարցեր, որոնք բարձրացնում էին, արդեն լուծումներ տրված են:
Նելլի ԳՐԻԳՈՐՅԱՆ
