Դոնեցկի դատարանը «Համառուսաստանյան պետական հեռուստաընկերության երկու լրագրողների՝ Իգոր Կորնելյուկի և Անտոն Վոլոշինի սպանության և ՌԴ պետական սահմանը ապօրինի հատման» մեղադրանքով մեղավոր է ճանաչել ուկրաինուհի զինծառայող Նադեժդա Սավչենկոյին և դատապարտել նրան 22 տարվա ազատազրկման ու պարտավորեցրել վճարել 30.000 ռուբլի տուգանք։
Ուկրաինուհի զինծառայողի գործով մեղադրական դատավճիռը, առաջին հերթին, խիստ դժգոհություն է առաջացրել Ուկրաինայում։ Նախագահ Պորոշենկոն իր զայրույթն է արտահայտել դատարանի կայացրած վճռի վերաբերյալ։ LB.ua լրատվական կայքը մեջբերել է նախագահի խոսքերը. «Նորմանդյան ձևաչափի շրջանակներում կայացած բարձր մակարդակի հանդիպումների ժամանակ Պուտինը խոստացավ այսպես կոչված դատարանի վճռի հրապարակումից հետո վերադարձնել Սավչենկոյին։ Ժամանակն է կատարել խոստումը»։
Պորոշենկոն իր հերթին խոստացել է Ռուսաստանին հանձնել ռուս զինծառայողներ Ալեքսանդրովին և Երոֆեևին, եթե Ռուսաստանը Ուկրաինային վերադարձնի Սավչենկոյին։ Հիշեցնենք, որ ռուս զինծառայողները մեղադրվում են Ուկրաինայի դեմ զինված ագրեսիայի մասնակցելու մեջ։
Սավչենկոյի հանդեպ կայացրած վճիռը լուրջ բողոք է առաջացրել Արևմուտքում։ Մասնավորապես, Եվրոպայի անվտանգության և համագործակցության կազմակերպության (OSCE) Ժողովրդավարական ինստիտուտների և մարդու իրավունքների տնօրեն (ODIHR) Մայքլ Ջորջ Լինքի տարածած հայտարարության մեջ նշվում է, որ ԵԱՀԿ-ն շարունակում է պահանջել, որպեսզի Սավչենկոն անմիջապես ազատ արձակվի։
Կարդացեք նաև
Սավչենկոյի գործի վերաբերյալ իր գնահատականն է տվել նաև ԱՄՆ Պետական դեպարտամենտի ներկայացուցիչ Ջոն Քիրբին։ ԱՄՆ արտաքին գերատեսչության ներկայացուցիչը անարդարացի է որակել դատարանի վճիռը՝ ասելով. «Նադեժդա Սավչենկոյի գործով կայացված վճիռը ակնհայտ արհամարհանք է՝ ուղղված արդարադատության սկզբունքներին»։
Սավչենկոյի գործով իր անհանգստությունն էր հայտնել ԵԽԽՎ նախագահ Պեդրո Ագրամունտը ` մտահոգություն հայտնելով, որ ապօրինի դատավճիռ է կայացվում ԵԽԽՎ-ում Ուկրաինայի մշտական պատվիրակության անդամ Նադեժդա Սավչենկոյի հանդեպ։ Սավչենկոյի գործով դատարանի կայացրած որոշման այս հատվածը կարծես հատուկ պատասխան լինի Ագրամունտի արտահայտած մտահոգությանը. «Սավչենկոյի անձեռնմխելիությունը որպես ԵԽԽՎ անդամ, օրենքի ուժ չունի նրա հանդեպ քրեական գործի շրջանակներում»։
Իր դժգոհությունն է արտահայտել նաև Մոսկվայում Եվրամիության ներկայացուցչությունը։ Տարածված հայտարարության մեջ ասվում է, որ Սավչենկոյի գործով Եվրամիության դիրքորոշումն անփոփոխ է և կառույցը պահանջում է անհապաղ ազատ արձակել ուկրաինուհի զինծառայողին։
