«ԵԱՀԿ/ԺՀՄԻԳ-ը, Վենետիկի հանձնաժողովը դեմ չի ցուցակների հրապարակմանը: Նման հայտարարություն սկսեցին տարածել որոշ խմբակցություններ: Հարգելիներս, անթույլատրելի է ստելը, բարձր ամբիոններից՝ առավել եւս»,- այսօր ԱԺ լսումներն ամփոփելիս իր ելույթում ասաց կառավարության ղեկավար-նախարար Դավիթ Հարությունյանը:
Ինչ վերաբերում է ընտրատարածքներին, Դավիթ Հարությունյանն ասաց՝ առանց այն էլ մենք կենտրոնացրել ենք ամեն ինչ Երեւանում. «Դառնում ենք մի քիչ շերեփուկի նման: Ի՞նչ իրավունք ունենք անտեսելու եւ չխթանելու քաղաքական մտքի զարգացումը տարածքներում»:
Նրա խոսքերով՝ վերջերս մեկը առաջարկ արեց, թե պարտավորեցնենք ցուցակներում անպայման մարզերից մարդիկ ընդգրկվեն. «Եթե ես վաղը գրանցվեմ Վահան գյուղում, ես դրանով դարձա Վահան գյուղի ներկայացուցի՞չ: Ո՛չ»:
Դավիթ Հարությունյանը գտնում է, որ խորհրդարանական կառավարման համակարգը ավելի ժողովրդավարական է, բայց դա չի նշանակում, որ այն միանգամից պետք է աշխատի ՀՀ-ում եւ փայլուն արդյունք ապահովի. «Քաղաքական կուսակցությունները կդառնան ոչ թե մարդ կուսակցություն, այլ իսկապես ժողովրդի շահերը ներկայացնող մտքի կոնցենտրացիայի կենտրոններ»:
Կարդացեք նաև
Նա ասաց, որ ընտրությունների նկատմամբ վստահությունը մեծացնելու նպատակով կարող են դիմել պապական մեթոդների. «Ինչպես մի անգամ մեկը կատակեց, ասում է՝ մասնակիցների մատի ծայրը կտրենք մի քիչ, այնպես, որ վերքը շուտ չբուժվի, ականջը կտրել: Կատակը կատակ, բայց կա մի հին սկզբունք՝ դուռդ փակ պահի, որ հարեւանիդ գող չասես»:
Դավիթ Հարությունյանը վստահեցրեց, որ պատրաստ են բոլոր ողջամիտ առաջարկները քննարկել, բայց անհեթեթ առաջարկների վրա ռեսուրս չեն ծախսելու:
Հռիփսիմե ՋԵԲԵՋՅԱՆ
