Այսօր Շիրակի նորանշանակ մարզպետ Հովսեփ Սիմոնյանը հանդիպեց մարզի լրատվամիջոցների ներկայացուցիչների հետ՝ հայտնելով, որ իր դուռը ցանկացած ժամի ու ցանկացած պահի բաց է ցանկացած լրատվամիջոցի համար: Նա հայտարարեց, որ լրագրողների հետ համատեղ է լուծելու մարզի հիմնախնդիրները: Հովսեփ Սիմոնյանը նաև ասաց, որ կողմ է լրատվամիջոցների քննադատությանը, քանի որ այն պաշտոնյային զգաստ է պահում, հնարավորություն է տալիս չլճանալու, սթափ լինելու:
Մարզպետը, խոսելով մարզի հիմնախնդիրներից, հայտարարեց, որ առաջնահերթ է համարում քաղաքացու վստահության վերականգնումը պետական պաշտոնյայի նկատմամբ, օրինակ՝ քաղաքացին պետք մտնի առողջապահական հիմնարկ ու զգա տարբերություն:
«Գտնում եմ, որ մեր տնտեսության բոլոր ոլորտներում կան առաջնահերթ խնդիրներ, հարց է ՝դրանցից որ մեկը որ ժամանակահատվածում շատ ավելի կարևորություն է ունենում, բայց որ մենք բոլոր ոլորտներում՝ կրթական, առողջապահական, ճանապարհաշինական ոլորտներում ունենք լուրջ խնդիրներ, որոնք լուծման պահանջ ունեն, դա փաստ է: Բայց այս ամբողջը կարևորելով՝ մենք միասին առաջին հերթին պետք է վերականգնենք ազգաբնակչության հավատքը, հիմա տեսեք կարող է ամենալավ բանն էլ անենք չհավատան, որ դա լավն է: Եթե մարդիկ սկսեցին իրենց վաղվա օրվան հավատալ, շատ հիմնախնդիրներ, ինքնըստինքյան լուծվելու են, եթե մենք այսօր կառուցելու ենք ճանապարհ, որ դրանով մարդկանց մեքենաները շարժվեն, եթե այդ ճանապարհները պետք է ունենանք, բայց մարդիկ չլինեն, ճիշտը ճանապարհը չունենալն է: Եթե տունը կառուցենք, մարդ չպիտի լինի մեջն ապրող…»:
Կարդացեք նաև
Լրագրողները հետաքրքրվեցին նաև, թե ի՞նչ եղավ Գյումրիի փողոցաշինության ու լուսավորության համար խոստացված 23 միլիոն եվրոն, տեղեկություննե՞ր ունի մարզպետը, վերջինս ասաց, որ իր տեղեկությունն այնքան է, որ դա վարկային ծրագիր է, քաղաքապետարանն էլ պարբերաբար լուսաբանում է, և ինքը ցանկություն չունի անդրադառնալ, քանի որ դրանից ավելի ասելիք չունի:
Ի դեպ, լրագրողների հետ զրույցում խոսք ընկավ նաև քաղաքի անօթևաններից ու տնակներից, Շիրակի մարզպետը հայտնեց, որ ինքը ևս բնակվում է տնակում:
Նունե ԱՐԵՎՇԱՏՅԱՆ
