ԱԺ-ում Ընտրական նոր օրենսգրքի թեմայով խորհրդարանական լսումներ են:
Կառավարության աշխատակազմի ղեկավար-նախարար Դավիթ Հարությունյանն ասաց, որ մի կարեւոր առաջարկություն են քննարկում՝ կուսակցություններին հնարավորություն տալ ընտրատեղամասում 2 վստահված անձ ունենալու. «Հակված ենք դրան, դրական է»:
Ինչ վերաբերում է ընտրատեղամասում ԶԼՄ ներկայացուցիչների եւ դիտորդների թվի սահմանափակմանը, Դավիթ Հարությունյանն ասաց, որ նոր կոմպրոմիսային մոտեցում են մշակել. «Ունենք մտավախություն, որ որպես թեկնածուի վստահված անձ, ԶԼՄ ներկայացուցիչները կլինեն կեղծ ներկայացուցիչներ: Քննարկվում է, որ ԶԼՄ-ները կարողանան ներկայացնել, օրինակ, 50 լրագրող»:
Քաղաքացիական պայմանագիր կուսակցության անդամ Նարեկ Հարությունյանը հարց ուղղեց. «Պատկերացրեք, մենք ունենք հարյուրավոր հեռուստաընկերություններ, կայքեր: Եթե նույնիսկ թիվը 50-ով սահմանափակեք, նորից նրանց անվան տակ կարող են իշխանության ներկայացուցիչները, թեկնածուների մարդիկ մուտք գործեն: Այստեղ լուծումը կիսատ է»:
Կարդացեք նաև
Դավիթ Հարությունյանը պատասխանեց. «Ես ընդունում եմ, որ իմ ասած լուծումն էլեգանտ լուծում չէ: Բայց բացարձակապես ճիշտ չեմ համարում, երբ մեկը վեր է կենում ու ասում է՝ էլեգանտ լուծում չէ, բայց ինքը լուծում չի առաջարկում: Ասացիք կան հարյուրավոր հեռուստաընկերություններ, ԶԼՄ-ներ, եթե բոլորը լինեն մի ընտրատեղամասում, դա կլինի ժողովրդավարակա՞ն ընտրություն, թե՞ կլինի ծաղր: Կարծում եմ, կլինի ծաղր: Դրա համար փորձել ենք ընտրել պարզեցված մեխանիզմ, ասում ենք՝ 50 ներկայացուցիչներ ընտրեք, թող նրանք էլ շրջեն ընտրատեղամասերը»:
Նա առաջարկեց այս հարցով ողջամիտ լուծումներ առաջարկել:
Հռիփսիմե ՋԵԲԵՋՅԱՆ
