Վարդգես Գասպարիի գործի քննությունը շարունակվում է: Դատավոր Նելլի Բաղդասարյանը, վերադառնալով խորհրդակցական սենյակից՝ հրապարակեց Գասպարիի պաշտպան Լուսինե Հակոբյանի նկատմամբ դատական սանկցիա կիրառելու մասին որոշումը:
Ըստ որի, Լուսինե Հակոբյանին պատասխանատվության ենթարկելու վերաբերյալ դատարանը դիմելու է Փաստաբանների պալատ:
Մինչ դատարանի՝ խորհրդակցական սենյակից վերադառնալը Գասպարիի երեք պաշտպանները հեռացել էին, քանի որ նախորդ դատական նիստին դատարանին զգուշացրել էին իրենց ծանրաբեռնվածության մասին: Իսկ Դավիթ Գյուրջյանը դատարանի գրասենյակում դիմում էր ներկայացրել, որով խնդրում էր դատական նիստը հետաձգել:
Սակայն, դատավորը համարեց, որ պաշտպանները հրաժարվել են իրացնել իրենց իրավունքները, քանի որ դատարանը նրանց թույլ չէր տվել լքել նիստերի դահլիճը: Դատարանը որոշեց շարունակել դատական նիստը՝ նրանց բացակայությամբ, եւ անցնել միջնորդության քննարկմանը:
Կարդացեք նաև
Սակայն Գասպարին միջնորդություն ներկայացրեց հետաձգել դատական նիստը եւ հրաժարվեց որեւէ դիրքորոշում արտահայտել: Դատարանը մերժեց միջնորդությունը եւ համարեց, որ Գասպարին հրաժարվում է իրացնել իր իրավունքները եւ պարտականությունները: Գասպարին լքեց նիստերի դահլիճը՝ հայտարարելով, որ դատարանի համար էական նշանակություն չունի պաշտպանական կողմի ներկայությունը կամ բացակայությունը: Այդ քայլը դատարանը դիտեց որպես դատական նիստերը ձախողելու, ձգձգելու միտում եւ որոշեց շարունակել դատական նիստը:
Մեղադրող Վահան Մանուկյանը անհիմն համարեց պաշտպանական կողմի ներկայացրած միջնորդությունը:
Ամի ՉԻՉԱԿՅԱՆ
