«Մենք անընդհատ անտառային տարածքներ ենք կորցնում։ Օրինակ, միայն Սյունիքի Քաջարան հանքավայրն, իմ հաշվարկներով, տարեկան 30-35 միլիոն տոննա թափոն է լցնում անտառածածկ տարածքների վրա։ Պատկերացրեք, թե ինչ է նշանակում ծանր մետաղներ պարունակող դատարկ կապարները լցնել անտառների վրա. հավերժորեն մտնում է անտառ եւ տարածք»,- «Նոյյան տապան» լրատվական գործակալության մամուլի սրահում անտառների պահպանության միջազգային օրվա կապակցությամբ հրավիրված ասուլիսի ընթացքում ասաց «Կանաչների միության» նախագահ Հակոբ Սանասարյանը։
Նա նշեց, որ նման խնդիր կա նաեւ այլ հանքավայրերի շրջակայքում։ Հակոբ Սանասարյանն ասաց, որ մարտի 17-ին, կառավարության նիստի ընթացքում, վիճակը բարելավվելուն միտված առաջարկություններ է ներկայացրել. «Ես առաջարկեցի, որ ստուգումներ իրականացնեն եւ ճշտեն, թե տարեկան ինչքան թափոն է լցվում անտառների վրա եւ քանի հեկտար անտառ է կորչում։ Երկրորդը՝ անտառային տարածքներն ընկնում են հանքարտադրության տակ. մետաղական եւ ոչ մետաղական։ Հիմա տեսնենք՝ կճշտվի այդ հարցը, թե ոչ»։
«Կանաչների միության» նախագահը շեշտեց, թե բազում անգամներ խոսվել է, որ Հայաստանում անտառները շատ քիչ են. «Մյուս կողմից՝ անտառները 95-99 տարով օտարում են եւ որպես վարձակալություն տալիս են ընկերություններին, որպեսզի այնտեղ նրանք հանքարտադրություն իրականացնեն։ Ի՞նչ է նշանակում 99 տարով վարձակալության տալ հանքարտադրության համար։ Եթե դուք անտառային տարածք տվեցիք հանքավերամշակման եւ հանքահանման համար, դուք կունենաք հետեւյալը։ Հանքահանումից հետո 2 կիլոմետր խորությամբ եւ լայնությամբ փոսեր են մնում, իսկ թափոնները լցվում են գետերի մեջ։ Սրանք միլիոնավոր տարիներ մեռնում են։ Նույնիսկ այդ թափոնները մաքրելու փորձից հետո, դրանք հնարավոր չի լինի օգտագործել գյուղատնտեսության համար»։
Աշոտ ԻՍՐԱԵԼՅԱՆ
Կարդացեք նաև
Լուսանկարը՝ «Նոյյան տապանի»
