Նախկին ԲՀԿ-ական Գեւորգ Պետրոսյանն այսօր հայտարարեց, որ պատրաստ է ԲՀԿ-ի կազմում մնալ, եթե կուսակցության ղեկավարը փոխի մարտավարությունը:
«Ես նրա հետ անձնական խնդիր չունեմ, իմ կռիվը կուսակցության պատիվը բարձր պահելու համար է, իմ կռիվը տիկին Զոհրաբյանի իրավաքաղաքական մտածողության դեմ է: Կուսակցության հիմնադրման օրից մեծ ներդրում եմ ունեցել եւ ցավալի է, որ այդ կուսակցությունը շատ արագ գնում է անկում»,-այսօր «Անալիտիկ» ակումբում ասաց կուսակցությունից հեռացված Գեւորգ Պետրոսյանը:
Նա, ի դեպ, պատրաստվում է դատի տալ Նաիրա Զոհրաբյանին, իր խոսքով, խախտված իրավունքները վերականգնելու համար: Պարոն Պետրոսյանը համոզված է, որ իրեն ապօրինի են հեռացրել կուսակցության շարքերից՝ առանց կուսակցության քաղխորհրդի որոշման: Ըստ նրա, կուսակցությունից իրեն հեռացնելու որոշումը տիկին Զոհրաբյանը կատարել է հեռախոսազանգով, ընդամենը Ավան վարչական շրջանի տարածքային կառույցի ղեկավարին ստիպելով: Ըստ նրա, ԲՀԿ-ն ունի ինքնամաքրվելու կարիք ու պետք է ինքնամաքրվի առաջինը Նաիրա Զոհրաբյանից:
Հեռացված կուսակցականը վստահեցնում է՝ բազմահազար ԲՀԿ-ականներ այսօր դժգոհում են ԲՀԿ առաջնորդ Նաիրա Զոհրաբյանից, բայց ինքն է որոշել դժգոհությունները բարձրաձայնել:
Կարդացեք նաև
«Այսօր ԲՀԿ-ն չունի կոնկրետ գաղափարախոսություն, գաղափարախոսությունը պետք է արտացոլվեր կուսակցության կանոնադրության մեջ: Բայց համոզված եմ՝ եթե հստակ գաղափարախոսություն ամրագրվեր, դա կխանգարեր տիկին Զոհրաբյանին վաղը մանեւրել: Կայացած կուսակցությունը գաղափարախոսություն ունեցող կուսակցությունն է»,- ասաց նախկին ԲՀԿ-ականը:
Գեւորգ Պետրոսյանը 2010-ից ԲՀԿ-ն լքել էր, նա կրկին ԲՀԿ վերադարձավ հինգ տարի հետո ու ինչպես ինքն է պնդում՝ Նաիրա Զոհրաբյանի առաջարկով:
«Նա ինձ հարցրեց՝ ինչ պայմաններով կվերադառնամ կուսակցություն, ես ասացի՝ եթե պատասխանատու որոշումները համապատասխան քննարկումների արդյունքում ընդունվեն, եւ ոչ թե միանձնյա:
Առաջին պայմանը խախտվեց, երբ նոր էի վերադարձել ու արտահերթ համագումար անցկացնելու անհրաժեշտություն եղավ, մի հանդիպում է եղել, կարծիք եմ հայտնել, որ նախադրյալներ չկան արտահերթ համագումարի, կամ եթե գնում ենք համագումարի, ապա լավ առիթ է, որ օրակարգում ընդգրկվեն կարեւոր հարցեր, օրինակ` կանոնանդրության կարեւոր եւ այլ հարցեր ներառելը, եւ ոչ թե արտահերթ համագումար հրավիրել ու կուսակցության նախագահի լիազորություններն ավելացնելու հարց ներառել:
Իմ կարծիքը կոշտ դիմադրության արժանացավ, կարծիքս դիտվեց կոպիտ նախաձեռնություն: Հեռախոսով մի քանի անգամ զանգահարել ու հետաքրքրվել եմ՝ ինչ հանձնարարություններ ունի ինձ համար, անընդհատ կրկնեց՝ կզանգեմ, ես կասեմ ու այդպես ոչ մի կապ չեղավ:
Կրկնում եմ՝ իմ խորին համոզմամբ, նա քանդում է կուսակցությունը. մինչեւ նրա գալը, կուսակցությանը մեղադրում էին՝ բարեգործական կուսակցություն է, նրա գալուց հետո ենթադրվում էր՝ կուսակցությունը պետք է անցում կատարեր քաղաքական ուղեգծի, բայց այսօր ոչ այն ունենք, ոչ՝ այն»:
Գեւորգ Պետրոսյանը պահանջում է նաեւ իրեն կուսակցությունից հեռացնելու որոշումը. «Խնդրում եմ՝ ինձ տրամադրեք, որ գնամ դատարան իմ իրավունքները վերականգնեմ»:
Նաիրա Զոհրաբյանի պարզաբանումը՝ շուտով:
Արփինե ՍԻՄՈՆՅԱՆ
