Թուրքիայի ԱԳ նախարար Մևլութ Չավուշօղլուն հեռախոսազրույց է ունեցել բելգիացի իր պաշտոնակից, փոխվարչապետ Դիդիե Ռեյնդերսի հետ։ Այս մասին տեղեկացնում է թուրքական «Անադոլու» լրատվական գործակալությունը։
Աղբյուրի փոխանցմամբ՝ կայացած հեռախոսազրույցի ընթացքում Չավուշօղլուն անհանգստություն է հայտնել՝ Բրյուսելում Քրդական աշխատավորական կուսակցության (PKK) ներկայացուցչություն բացվելու առնչությամբ։ Չավուշօղլուն նշել է, որ Թուրքիայի համար անընդունելի է Եվրամիության սրտում ահաբեկչական կազմակերպության (Քրդական աշխատավորական կուսակցության գործունեությունը Թուրքիայում արգելված է, երկրի իշխանությունները կուսակցությունը բնութագրում են որպես ահաբեկչական կազմակերպություն,-խմբ.) ներկայացուցչություն բացվելը և Բելգիայի իշխանություններից պահանջել է անմիջապես քայլեր ձեռնարկել՝ Քրդական աշխատավորական կուսակցության գրասենյակը փակելու համար։
Հաղորդվում է նաև, որ հեռախոսազրույցից բացի՝ կատարվածի վերաբերյալ Թուրքիայի դժգոհությունը փոխանցելու համար, Թուրքիայի ԱԳՆ է կանչվել Անկարայում Բելգիայի արտակարգ և լիազոր դեսպանը։
