«Ի՞նչ էր ասում Լյուդմիլա Սարգսյանը, Հրանտ Բագրատյանը, Նիկոլ Փաշինյանը… ՀԱԿ-ը մի քիչ լայն հասկացություն է: Այլ հարց է`ՀԱԿ-ի որոշ քաղաքական գործիչներ, որոնք չեն ուզում ոչ մի դրական բան տեսնել, որոնք արդեն գիտեն իրենց ճակատագիրը, իրենց մարդկային ռեսուրսը եւ պետք է անընդհատ այն թշնամությունը, վրեժխնդրությունը ժողովրդից հանեն, որ անընդհատ մուր շպրտեն, ցեխոտեն, կեղտոտեն: «Մեզնից հետո, թեկուզ ջրհեղեղ» վերնագրով շարժվում են առաջ: Որեւէ լավ բան չնկատող մարդու հետ որեւէ աշխատանք տանելը ես անիմաստ եմ համարում»,- խորհրդարանում լրագրողների հետ զրույցում ասաց ՀՀԿ խորհրդարանական խմբակցության ղեկավար Վահրամ Բաղդասարյանն` ամփոփելով ուրբաթ օրը խորհրդարանում կայացած Ընտրական օրենսգրքի շուրջ քննարկումների արդյունքները:
Վահրամ Բաղդասարյանը, նաեւ քաղաքական մեծամասնությունը, լուծումներ են տեսնում ՀԱԿ պատգամավորներ Լեւոն Զուրաբյանի եւ Արամ Մանուկյանի արտահայտած մտահոգությունների համար. «Բայց իրենք չեն կարող, այդ մարդիկ պարզապես ունակ չեն որեւէ բան լսել, եթե դա ասվում է իշխանության կողմից»:
Լրագրողներից մեկը հետաքրքրվեց`ի՞նչ նկատի ունի Վահրամ Բաղդասարյանը, երբ ասում է Լեւոն Զուրաբյանն ու Արամ Մանուկյանը գիտեն իրենց ճակատագիրը: «Իրենք դատապարտված են, իրենք գիտեն, որ այս ժողովուրդն իրենց տեսել է, այլեւս չի վստահելու: Նրանք վտանգի տակ են նաեւ մյուս խորհրդարան գալու համար: Ես խիստ կասկածում եմ, որ կլինեն»:
Նելլի ԳՐԻԳՈՐՅԱՆ
