Ինչպես Հայաստանում, այնպես էլ շատ այլ երկրներում, արտաքին քաղաքականությունը շատ բաներով պայմանավորված է ներքին քաղաքականությամբ, այսինքն, եթե իշխանությունը ներսում լեգիտիմ չէ, ապա բնական է, արտաքին ուժերի ձեռքում լինելու է «խաղալիք»: Այսօր այս մասին «Երկու երես» մամուլի ակումբում ասաց «Ազգային համաձայնություն» կուսակցության նախագահ Արամ Հարությունյանը:
«Երկիրը կործանվում է, իշխանությունն ամեն ինչ անում է, որ նորից մնա իշխանության, թալանի եւ դարձյալ մնա իշխանության: Այսքան վատ վիճակ Հայաստանում չի եղել. պատերազմի ժամանակ պարզ էր՝ ինչո՞ւ լույս չկա, ինչո՞ւ էինք վատ ապրում, բայց հիմա պարզ չէ, թե ինչու ենք վատ ապրում, նրա համար, որ մի քանի հոգի հարստանա՞ն,- նշեց Արամ Հարությունյանը՝ ավելացնելով,- Եթե մարդը հազար դրամի խնդիր ունի, ասելու բան էլ չէ, ցավով եմ ասում, բայց եթե ազատամարտիկը մեկից պարտքով հազար դրամ է ուզում, դա նշանակում է, որ «վերջն է», որ կոպիտ ասած՝ երկրի դուռը պետք է փակենք, գնանք»:
Մարդիկ, ըստ նրա, լուրջ խնդիրներ ունեն ու կապ չունի աշխատում են, թե՝ ոչ. «Ինտելիգենտ արտաքինով կինը մտնում է խանութ ու կես հաց առնում, ծնողը երեխայի համար չի կարողանում քաղցրավենիք գնել եւ այլն»:
Ըստ նրա, այսօր, Սերժ Սարգսյանը վախենում է միայն ժողովրդից, իսկ ժողովուրդը, նրա խոսքերով, հենց այնպես չի գա հրապարակ, քանի որ տեսնում է, որ քաղաքական ուժերը իրար կողք չենք կանգնում. «Նա ինչու պետք է իր գործը թողնի, գա, կանգնի, թե մեկը ինչ-որ «տոնածառ» է դնում այնտեղ: Ինչ -որ հարյուրամյակ ասել, կամ քշել՝ գնալ Ղարաբաղ, որ ճանապարհին կոնֆլիկտ սարքել կամ ոստիկանի հետ փորձել մտնել հարաբերությունների մեջ, որ հետո էլ կոնֆլիկտ առաջանա եւ ձերբակալեն եւ հետո էլ ակցիա անեն, որ ձերբակալողին ձերբակալեն՝ ինձ համար ընդունելի չէ: Այսօր, այո, Գեւորգ Սաֆարյանին պետք է բաց թողնեն, դա ուրիշ խնդիր է, բայց այսօր ամեն ինչ բերել դրան, որ մենք տոնածառ էինք դնում, մեզ խանգարեցին՝ աբսուրդ է, ծիծաղելի է, որը ավելի շատ օգտակար է Սերժ Սարգսյանին»:
Կարդացեք նաև
Արամ Հարությունյանի խոսքերով «Ոչ» ճակատի համախմբումը չստացվեց եւ ձախողման հիմնական պատասխանատուն դարձավ «Հիմնադիր խորհրդարան»-ը: «Ինձ համար անընդունելի է այսքան ժամանակ զբաղեցնել Ազատության հրապարակը: Համոզված եմ, որ եթե «Նոր Հայաստան»-ը պատի վրա գրի՝ «Կեցցե Սերժ Սարգսյանը», ապա ոչ մեկ չի էլ նկատի: Մենք տեսնում ենք, որ նրանք զբաղված են ավելի շատ ընդդիմադիր դաշտի վրա քարեր գլորելով, քան թե գործ անելով: Համախմբումը ոչ թե պետք է լինի այնպես, որ մեկը գնա Ազատության հրապարակ եւ բոլորին ասի՝ բոլորդ եկեք այստեղ, այլ մինչեւ դա պետք է լինեին կոնսուլտացիաներ»:
Արամ Հարությունյանը խոսելով այսօր Հայաստանում ձեւավորվող մի շարք կուսակցությունների մասին՝ նշեց, որ այսօր Հայաստանում անգրագետի-գրագետի խնդիր չի, կարող է մեկը շատ գրագետ լինի, բայց լինի ստոր, մյուսը այդքան էլ գրագետ չլինի, բայց լինի ավելի անկեղծ:
Ինչ վերաբերում էր Վարդան Օսկանյանի կողմից կուսակցության ստեղծմանը, նա նշեց, որ համոզված է, որ Օսկանյանը անկեղծ է, որ նրա նպատակը ֆոն ստեղծելը չէ. «Օսկանյանը ընդունելի է քաղաքական շրջանակների համար, անցել է մեծ ճանապարհ՝ ընդ որում նա կապեր ունի եւ ընդունելի է արտաքին՝ ե՛ւ Ամերիկայի, ե՛ւ Ռուսաստանի կողմից: Նա ի վիճակի է պառլամենտում լուրջ կռիվ տալու: Նա ոչ մի ճամբար չի փոխել՝ Քոչարյանի ժամանակ էլ է նույնը մնացել, հիմա էլ: Ես կցանկանամ, որ Օսկանյանը նախաձեռնի համախմբում եւ մեր կուսակցության անունից կարող եմ ասել, որ պատրաստ ենք համագործակցել»:
Անուշ ՄԱԹԵՎՈՍՅԱՆ
