«Yerevan Mall»-ի հարակից տարածքում անցկացվեց ավտոմոբիլային սպորտի կանանց ձեւավոր վարման Հայաստանի առաջնության 1-ին փուլը՝ նվիրված մայրության եւ գեղեցկության տոնին:
Առաջնությանը մասնակցեցին Հայաստանի ավտոմոբիլային սպորտի ֆեդերացիայի կանանց ակումբի անդամ 11 կին վարորդներ: Նրանք մրցեցին ինը վարժությունից, սկսած դեպի առաջ ու ետ օձաձեւ վարումից, վերջացրած զուգահեռ եւ հետադարձ ճիշտ կայանումով:
Ավտոմատ եւ մեխանիկական փոխանցման տուփերով Մերսեդես մակնիշի երկու ավտոմեքենա տրամադրել էր «Մոբիլ Ստարտ» ավտոդպրոցը եւ մասնակիցները ազատ էին ընտրության մեջ:
Ավտոմոբիլային սպորտի ֆեդերացիայի կանանց ակումբի ղեկավար Իրինա Բելուբեկյանը, որն առաջնության կազմակերպիչն է, Aravot.am-ին ասաց. «Այսօր գեղեցիկ սեռի ներկայացուցիչներին ղեկի առջեւ տեսնելը սովորական է դարձել: Փոխվել են ժամանակները, կյանքը, մտածելակերպը, կյանքն ընդհանրապես: Մեքենա վարելը կնոջ համար դարձել է պահանջ. պետք է երեխաներին դպրոց տանել, հասնել աշխատանքի եւ այլն:
Կարդացեք նաև
Կանանց մասնակցությամբ ավտոմոբիլային սպորտը Հայաստանում բավականին հետաքրքիր է դարձել որպես մարզաձեւ: Առաջնության երկրորդ փուլը կկայանա ապրիլի վերջին եւ երկու փուլերի հանրագումարով կորոշվեն կանանց ձեւավոր վարման հանրապետության չեմպիոնն ու մրցանակակիրները»:
Հարցին, թե կարծիք կա, որ կանայք վատ վարորդներ են, Իրինա Բելուբեկյանը պատասխանեց. «Համաձայն չեմ: Կանայք ավելի կարգապահ եւ ուշադիր են ղեկի առջեւ: Իհարկե, վատ վարողներ էլ կան: Բայց տղամարդկանց մեջ էլ այդպիսիք քիչ չեն»:
Աշոտ ՀԱԿՈԲՅԱՆ
