Ֆրանսիայում հավատարմագրված թուրք դիվանագետները հարգանքի տուրք են մատուցել ԱՍԱԼԱ-ի գործողություններին զոհ գնացած թուրք դիվանագետների հիշատակին։ Այս մասին տեղեկացնում է թուրքական «Հաբերլեր» լրատվական գործակալությունը։
Հիշատակման արարողությունները տեղի են ունեցել Ֆրանսիայի մայրաքաղաք Փարիզում։ Միջոցառմանը ներկա Ֆրանսիայում Թուրքիայի արտակարգ և լիազոր դեսպանի առաջին տեղակալ Ալի Օնաները իր խոսքում նշել է. «Մենք այստեղ ենք Փարիզում զոհված մեր գործընկերների և Թուրքիայի քաղաքացիների հիշատակը հարգելու համար, որոնք զոհ են գնացել ԱՍԱԼԱ ահաբեկչական կազմակերպության հետևանքով»։
Տեղեկացնենք, Հայաստանի ազատագրության գաղտնի բանակը (ԱՍԱԼԱ) մի քանի գործողություններ է իրականացրել Ֆրանսիայում, որոնց հիմնական թիրախն այդ երկրում հավատարմագրված թուրք դիվանագետներն էին։ Այսպես, 1975թ. հոկտեմբերի 24-ին Փարիզում սպանվել է Ֆրանսիայում հավատարմագրված Թուրքիայի արտակարգ և լիազոր դեսպան Իսմայիլ Էրեզը և նրա վարորդ Թալիփ Յեները։ 1979թ. դեկտեմբերի 22-ին Փարիզի փողոցներից մեկում սպանվել է Փարիզի մշակույթի և զբոսաշրջության հարցերով խորհրդական Յըլմազ Չոլփանը։ 1981թ. մարտի 4-ին սպանվել է Թուրքիայի դեսպանատան աշխատանքային խորհրդական Ռեշաթ Մորալը։ Նույն օրը սպանվել է նաև դեսպանատան կրոնական հարցերով աշխատակից Թեջելի Արըն։ 1981թ. սեպտեմբերի 24-ին սպանվեց Թուրքիայի դեսպանատան անվտանգության հարցերով ատաշե Ջեմալ Օզենը։ 1983թ. հունիսի 15-ին էլ Փարիզում սպանվեցին Թուրքիայի քաղաքացիներ Հալիթ Յըլմազն ու Հուսեյն Մեմիշը։
