Էրեբունի եւ Նուբարաշեն վարչական շրջանների ընդհանուր իրավասության դատարանն այսօր բավարարել է ՀՀ պաշտպանության նախարարի կնոջ՝ «Զինվորական բժիշկների հայկական ասոցիացիա» ՀԿ նախագահ Ռուզաննա Խաչատրյանի հայցն ընդդեմ Hzham.am կայքի։
Հիշեցնենք, որ «Հայկական ժամը» Hzham.am կայքում վիրավորական նյութեր էր հրապարակել, որոնցում առկա էին հայհոյախառն արտահայտություններ։ Սեյրան Օհանյանի կինը ԶԼՄ-ից պահանջում էր ոչ միայն հերքում, ներողություն, այդ նյութերի հեռացում կայքից, այլեւ 2 մլն դրամ՝ զրպարտությունների համար, 1 մլն դրամ՝ վիրավորանքների համար։
Ռուզաննա Խաչատրյանի շահերի ներկայացուցիչ, փաստաբան Կարեն Մեժլումյանն Aravot.am-ի տեղեկացրեց, որ հայցը բավարարվել է եւ վիրավորանքի, եւ զրպարտության մասերով։ «Դատարանը պարտավորեցրել է հերքում, ներողություն խնդրել, կայքից հեռացնել այդ հոդվածները եւ գումարային փոխհատուցում տրամադրել։ Զրպարտության մասով 500.000, վիրավորանքի մասով՝ 300.000»։
Պատասխանող կողմը դատաքննության ընթացքում չէր ներկայանում նիստերին։ Կարեն Մեժլումյանից հետաքրքրվեցինք, թե մասնակցե՞լ են արդյոք կայքի ներկայացուցիչները վճռի հրապարակմանը. «Չէին ներկայացել էլի։ Ասելիք չունեն։ Գան ի՞նչ ասեն։ Բացի այն, որ դատարանը միշտ ծանուցում է, ես միշտ իրենց էլեկտրոնային փոստին ուղարկել եմ տեղեկատվություն, որ նիստ է լինելու։ Հայհոյանքներ են գրել, գան ասեն ի՞նչ։ Ակնհայտ ստեր են գրել, ասելիք չունեն էլի։ Իրականում դա լրատվամիջոց չի, որ գան արդարանան։ Դա ինչ-որ գործելաոճ է, որով հնարավոր է իրենք տարբեր շորթումներ են արել։ Հավանաբար, դա էլ կբացահայտվի»։
Կարդացեք նաև
Փաստաբանը նաեւ հավելեց, որ իրենք չեն պատրաստվում բողոքարկել վճիռը. «Հոդվածները կհեռացվեն, փաստն ընդունվեց, որ զրպարտություն ու վիրավորանք են, ներողությունը կլինի, հերքումը կլինի։ Առաջին հերթին՝ մեզ դա էր հետաքրքիր»։
Աշոտ ԻՍՐԱԵԼՅԱՆ
