Ոստիկանությունն ընդդեմ «SOS» հաղորդաշարի հաղորդավար Վիլեն Գայֆեջյանի գործով այսօր ոստիկանության ներկայացուցիչ Հովհաննես Քոչարյանը Արաբկիր Քանաքեռ եւ Զեյթուն վարչական շրջանների ընդհանուր իրավասության դատարանին միջնորդեց, որ Վիլեն Գայֆեջյանը դատաքննության ընթացքում ապացուցի, որ հաղորդման թեման հանրային գերակա շահ էր եւ ինքը ԶԼՄ ներկայացուցիչ է:
Հիշեցնենք, որ ոստիկանությունը, ինչպես նաև ոստիկաններ Արթուր Մադաթյանը և Սերգեյ Զաքարյանը հայց են ներկայացրել YouTube-ով հեռարձակվող «SOS» հաղորդաշարի հաղորդավար Վիլեն Գայֆեջյանի դեմ՝ պատիվն ու արժանապատվությունը արատավորող, գործարար համբավը վնասող հրապարակային հաղորդում հեռարձակելու համար: 2015 թվականի մայիսի 24-ին, ժամը 22-ն անց 20-ին YouTube-ով «SOS»-ը հեռարձակել է «G/7» վերնագրով 11-րդ թողարկումը, որի ժամանակ, ըստ հայցվորների, հաղորդավարի կողմից հնչեցվել են վիրավորական արտահայտություններ ոստիկանության ծառայողների և մասնավորապես Արթուր Մադաթյանի և Սերգեյ Զաքարյանի հասցեին:
Հովհաննես Քոչարյանի խոսքով, «SOS»-ը չի կարող լրատվամիջոց լինել, որովհետեւ լրատվամիջոցը տեղեկատվության պաշար է, մինչդեռ «SOS»-ը տեղեկատվություն տարածող չէ:
Վիլեն Գայֆեջյանի պաշտպան՝ փաստաբան Հակուհի Հարությունյանն էլ պնդեց, որ ԶԼՄ-ի մասին օրենքի երրորդ հոդվածի համաձայն «SOS»-ի գործունեությունը տեղավորվում է ԶԼՄ-ի սահմանման ձեւակերպման մեջ. «Նման հասկացության ներքո էլ պաշտպանության ենթակա է»:
Կարդացեք նաև
Հովհաննես Քոչարյանն էլ առարկեց. «ԶԼՄ-ի մասին օրենքը սոցիալական մեդիա հասկացություն չի նախատեսում»:
Նախքան հերթական նախնական դատական նիստը հետաձգելը՝ դատարանը կողմերին հարցրեց՝ արդյոք չե՞ն ցանկանա հաշտության գալ, ոստիկանության ներկայացուցիչ Հովհաննես Քոչարյանը կտրականապես բացառեց՝ ասելով, որ հաշտության եզրեր չի տեսնում, իսկ ոստիկաններից մեկի պաշտպանն ասաց, որ
գուցե հրաժարվեն ամբողջական ֆինանսական փոխհատուցման պահանջից, եթե պատասխանող կողմը ներողություն խնդրի ու ընդունի, որ վիրավորել է:
Հաջորդ դատական նիստը նշանակվեց ապրիլին:
Արփինե ՍԻՄՈՆՅԱՆ
