ԱԺ պատգամավոր Մարգարիտ Եսայանը մարտի 18-ին «ՀՀ ընտրական օրենսգիրք» նախագծի շուրջ քննարկման ընթացքում կառավարության աշխատակազմի ղեկավար-նախարար Դավիթ Հարությունյանին երկու հարց ուղղեց:
Մարգարիտ Եսայանի առաջին հարցը վերաբերվում էր ընտրատեղամասում լրագրողների եւ դիտորդների թվի սահմանափակմանը: Նա նշեց, որ բազմիցս ընտրություններ է լուսաբանել, եւ հասկանում է, որ բավարար չի լինելու, որպեսզի ամբողջ սպեկտորը ներկայացվի եւ լուսաբանումը անկողմնակալ լինի: Մարգարիտ Եսայանը հետաքրքրվեց, թե որքա՞ն է հնարավորությունն այդ թիվը փոխելու:
Դավիթ Հարությունյանը առաջարկեց միասին որոշել եւ սահմանել լրագրողների եւ դիտորդների թիվը:
Մարգարիտ Եսայանի մյուս հարցը ընտրատեղամասը տեսանկարահանելու մասին էր: Նա խնդրեց մանրամասնել, թե ինչու հնարավոր չէ ամբողջական եւ միասնական կենտրոնից տեսանկարահանելը:
Կարդացեք նաև
Դավիթ Հարությունյանը պատասխանեց, որ իր համոզմամբ, տեսախցիկը ոչ մի հարց չի լուծելու. «Դրա համար առաջարկեցինք ցանկացած վստահված անձ լուսանկարի այն, ինչ խնդրահարույց է համարում: Լավագույն լուծումը լինի, որ պահպանենք գործողը, ով ուզում է, ինչ ուզում է լուսանկարահանի: Օնլայն հեռարձակում հնարավորություն է ընձեռելու այն անձանց, որոնք խոստացել են մասնակցել ընտրություններին, նայել եւ հետեւել: Ոչ օնլայն տեսանկարահանելը խնդիր չէ»:
Մարգարիտ Եսայանը արձագանքեց, որ կարծես թե համամիտ է Դավիթ Հարությունյանի հետ, սակայն խնդրեց վերանայել լրագրողների եւ դիտորդների թիվը. «Որովհետեւ գիտեմ, թե ինչ է նշանակում, որ սահմանափակ թվով է»:
Ամի ՉԻՉԱԿՅԱՆ
