2016թ. մարտի 18-ին Մոսկվայում ԱՊՀ անդամ երկրների մասնակցությամբ կայանալիք տնտեսական միջազգային ֆորումից առաջ МКР Медиа-ն ռուսերեն և անգլերեն լեզուներով զեկույց է հրապարակել, որը վերնագրված է «Եվրասիական ինտեգրացում. արդյունքներ, միտումներ և կանխատեսումներ. ԵԱՏՄ-ն 2015թ.»։ Այս մասին տեղեկանում ենք МКР Медиа-ի պաշտոնական կայքից։
Զեկույցի պատրաստման աշխատանքներին մասնակցել են փորձագետներ Հայաստանից, Բելառուսից, Ղազախստանից, Ղրղզըստանից և Տաջիկստանից։ Զեկույցում լակոնիկ ներկայացված են եվրասիական ինտեգրացման գործընթացները՝ հաշվի առնելով 2015թ. իրադարձություններն ու միտումները, նախանշված են առաջիկա անելիքները։
Զեկույցի համաձայն՝ 2015թ. կազմակերպության ստեղծումով ԵԱՏՄ-ն կտրուկ արագացրեց եվրասիական ինտեգրացման մասշտաբային մի քանի ծրագրերի իրագործումը՝ ավելացնելով գործնական, քաղաքական, միջմշակութային հաղորդակցությունը անդամ պետությունների միջև։
Մասնագետների գնահատականներով՝ 2015թ. ԵԱՏՄ զարգացման գլխավոր առանձնահատկությունը տնտեսական պրագմատիզմն էր։ ԵԱՏՄ հանդեպ հետաքրքրություն է դրսևորել ավելի քան 100 երկիր, որից 40-ը պատրաստ է բանակցել կազմակերպության հետ՝ ազատ առևտրի գոտի ստեղծելու համար։
Կարդացեք նաև
Մասնագետների գնահատականներով, եթե նախկինում ԵԱՏՄ-ն առաջնահերթություն էր համարում իր սահմանների տարածումն ու լայնացումը, ապա այժմ կազմակերպությունը հիմնական առաջնահերթություն կհամարի խորքային զարգացումը։
Անդրադառնալով ԵԱՏՄ առջև ծառացած մարտահրավերներին և կազմակերպության հետագա զարգացման տեսլականներին՝ ՀՀ ԱԺ նախկին պատգամավոր Արամ Սաֆարյանը ուշադրություն է հրավիրել հետևյալի վրա. «Հարավային Կովկասում ապրող բնակչության համար ամենամեծ վտանգը Մերձավոր Արևելքի արմատական իսլամական ուժերն են։ Անթույլատրելի է թեժ կետերի ընդարձակումն ու տարածումը և դրանց մոտեցումը ԵԱՏՄ սահմաններին»։
