ԱԺ-ում այսօր քննարկվեց պետական պարգեւների եւ կոչումների շարքում Վաստակավոր շինարարի կոչում ավելացնելու մասին նախագիծը:
ԲՀԿ խմբակցության ղեկավար Նաիրա Զոհրաբյանը կոչ արեց շինարարներին չխաբվել եւ չվիրավորվել, որ իրենք ընդդիմանում են դրան. «Մոլորության մեջ չընկնեք, այս նախագիծը որեւէ կապ չունի ձեր վաստակը գնահատելու հետ: Այս կոչումն ընդամենը մի քանի խմբերի կորպորատիվ շահերը սպասարկելու համար է՝ տենդերային բազարներում բոնուսային առավելություն ստանալու համար»:
Նաիրա Զոհրաբյանը կոչ արեց գնալ իրական արժեքների հետեւից. «Ես անհարմար եմ զգում նույնիսկ հնչեցնել էդ անունը, որ տրվեց վաստակավորի կոչում: Դերասան, երգիչ, ճարտարապետ, գրող, ամեն ինչ գլխիվայր շուռ է եկել, պետք է վերականգնվի արժեքային համակարգը»:
Ըստ նրա, ինչ-որ մի «սխոդկա» հիշեցնող միություն կամ գրական հանձնաժողով չէ, որ պետք է որոշի, թե որ ստեղծագործությունը պետք է ներկայացվի մրցանակի. «Հրանտ Մաթեւոսյանին երբ հարցրեցին, վարպե՛տ, ինչու եք վերջին ժամանակներս սկսել քիչ գրել, նա պատասխանեց, որովհետեւ ես կորցրել եմ զբոսայգում նստած գիրք կարդացող իմ ընթերցողին: Այո, քանի որ մենք իրական արժեքները, իրական գրականությունը գնահատելուց շատ ենք հեռացել, այսօր սխոդկաներն են որոշում, թե որտեղ եւ ինչ մակարդակով պետք է տրվեն մրցանակները, ես կարծում եմ, մենք գլոբալ առումով պիտի վերանայենք այս խնդիրը»:
Կարդացեք նաև
Նաիրա Զոհրաբյանն ասաց, որ դեռ չգիտի, թե ինչպես կքվեարկի ԲՀԿ-ն նախագծին, բայց ինքը դեմ է. «Մենք հոգեւոր ճգնաժամ ենք ապրում եւ պիտի կարողանանք այս ճգնաժամից ազատվել»:
ԱԺ փոխխոսնակ Հերմինե Նաղդալյանը ասաց, որ վաստակ ունեցող մարդկանց պետք է գնահատել. «Գնահատելու ձեւերը տարբեր են՝ կոչումներ, պարգեւներ, մեդալներ, բայց էությունը նույնն է: Կոչում տալու մեջ որեւէ վատ բան չկա»: Ըստ տիկին Նաղդալյանի, ԵԽԽՎ-ն էլ ունի պատվավոր անդամի մրցանակ, այնպես որ, դա պատիվ է, աշխատանքի գնահատական: Ուսուցիչները, բժիշկները մեծ հպարտություն են զգում՝ կոչում ստանալիս:
Հռիփսիմե ՋԵԲԵՋՅԱՆ
