Ազգային Ժողովում ՀՀ Տնտեսական մրցակցության պաշտպանության պետական հանձնաժողովի 2016 թվականի տարեկան գործունեության ծրագրի քննարկման ժամանակ ՀՀ ԱԺ ԲՀԿ խմբակցության քարտուղար Վահե Էնֆիաջյանի ելույթը
Պետք է խոսել փաստերով, թվերով և խորհրդարանական ամբիոնից հաճախ է այդպես արվում, սակայն ոչ միշտ են ճիշտ ուղղություններ տրվում, թե ինչպես կարելի է խնդիրներին լուծումներ տալ:
Ունենք հետևյալ պատկերը՝ Հայաստանի տնտեսությունը չունի բավականաչափ գրավչություն: Հասկանում ենք, որ չունենալով ելք դեպի ծով, լուրջ խնդիրների առաջ ենք կանգնում մեր տնտեսությունը զարգացնելիս: Չունենք էներգակիրներ, ինչպես նաև տարածաշրջանային ներկայիս վիճակը դրական չի ազդում տնտեսության վրա:
Սակայն, մենք ունենք բավականաչափ ռեսուրսներ և ապրանքաշրջանառություն, որը, մեղմ ասած, գտնվում է ստվերում, և այստեղ կոնկրետ քայլեր անելով հնարավոր է արդյունավետության բարձրացմանն ուղղված մի շարք ծրագրեր իրականացնել, որը գտնվում է ՏՄՊՊՀ-ի լիազորությունների ներքո:
Կարդացեք նաև
Մենք՝ որպես խորհրդարանականներ, պատրաստ ենք նաև մեր լիազորությունների սահմաններում անել ամենը, որպեսզի ցանկալի արդյունքին հասնենք:
Հրապարակեմ որոշ թվեր. ըստ Կենտրոնական բանկի կանխատեսումների` 2016թ.-ին Հայաստանում սպասվում է միջինացված 18.1 տոկոս գործազրկության ցուցանիշ՝ նախորդ 18.0-ի փոխարեն :
ՀՀ-ում աղքատության ընդհանուր ցուցանիշը, ըստ վերջին տվյալների, շուրջ 32 տոկոս է, Հայաստանում կա 77.5 հզ. գործազուրկ քաղաքացի, որոնցից 25 տոկոսը՝ երիտասարդներ, իսկ շուրջ 70 տոկոսը` կանայք:
Առկա են մի շարք ոլորտներ, որոնք կարելի է մենաշնորհային համարել, սակայն, եթե դա այդպես չէ, ապա կոչ եմ անում ՏՄՊՊՀ ղեկավար Արտակ Շաբոյանը տա համապատասխան պարզաբանումներ:
Այսպիսով, մի շարք ոլորտներում, համապատասխան մամուլում առկա հրապարակումների, առկա է մենաշնորհային իրավիճակ, ավելի կոնկրետ` վառելիքի, դեղորայքի, շաքարավազի, բանջարեղենի, մրգերի, վերջինիս դեպքում կոնկրետ բանանի, որն ի դեպ ՌԴ-ում վաճառվում է 45-50 ռուբլիով՝ մոտ 300 ՀՀ դրամ, սակայն ՀՀ-ում բանանը վաճառվում է մոտ 900 ՀՀ դրամով:
ՌԴ մաքսային ծառայության տվյալների շտեմարանում արձանագրված է, որ 2014 թ-ին ՌԴ-ից Հայաստան արտահանվել է 100.000 տոննա բենզին, որի մաքսային արժեքը կազմել է 72 մլն դոլար, այսինքն` 1 լիտր բենզինը ՌԴ-ում ձեռք է բերվել 72 ցենտով, այդ նույն ժամանակահատվածում մեր երկրում 1.14 դոլար էր՝ շուրջ 470 ՀՀ դրամ:
Այլ կերպ ասած` ձեռքբերման և իրացման գների տարբերությունը յուրաքանչյուր լիտրի համար 44 ցենտ է:
Ըստ նույն աղբյուրի` 2015 թվականին ՌԴ-ից Հայաստան է արտահանվել 122 հազար տոննա՝ 55 մլ դոլար մաքսային արժեքով, այսինքն՝ 1 լիտրը 44 ցենտ, մինչդեռ, Հայաստանում այն վաճառվում էր 430 դրամով կամ 90 ցենտով:
Այս հրապարակումները մտահոգվելու առիթ են տալիս:
Այս համատեքստում ՏՄՊՊՀ տարեկան հաշվետվություն է ներկայացրել, որտեղ պետք է արծարծվեին` արդյոք բարձրացված խնդիրներն իրոք առկա են Հայաստանի Հանրապետությունում և ի ՞ նչ քայլեր է ձեռնարկելու ոլորտի պատասխանատու մարմինը:
ՀՀ ԱԺ Բարգավաճ Հայաստան
Խմբակցության քարտուղար
Վահե Էնֆիաջյան
