«Վաստակավոր լինելը հասարակական գնահատական պետք է լինի, ոչ թե պետական: Սա ոչ մի տեղ չտանող ճանապարհ է: Սխալ սանդղակավորում է մտցնելու հանրության մեջ: Պիտի ասեն՝ այս մի շինարարության քարտաշը վաստակավոր է, բայց պիտի ճանաչել բոլոր շինարարներին, նոր որոշեք: Պարոն նախարար, եկեք այս մի նախագիծը մենք մերժենք, եւ սա առիթ դառնա, որ այս հարցերը կառավարությունում դարձնեք քննարկման առարկա: Խոնարհվելով բոլոր շինարարների առջեւ՝ հասկանանք, որ սա որեւէ կերպ կապ չունի շինարարներին սիրաշահելու հետ: Սա պարզ իրողության մեջ դառնալու է առիթ շինարարական տենդեր ստացած որեւէ կազմակերպության ղեկավարի պատվելու եւս մի մեդալով, որ մի հատ սեղան գցի, իրիկունը հավաքվեն՝ նշելու իր ստացած տենդերը»,- ԱԺ-ում ՀՀ պետական պարգեւների եւ կոչումների մասին օրենքի նախագծի քննարկման ժամանակ այսպիսի տեսակետ հայտնեց ՀՀԿ պատգամավոր Սամվել Ֆարմանյանը: Քաղաքաշինության նախարար Նարեկ Սարգսյանը նախագծով առաջարկում է սահմանել Վաստակավոր շինարարի պատվավոր կոչում, քանի որ Վաստակավոր արտիստ, Վաստակավոր դերասանի կոչում կա, շինարարի չկա:
Սամվել Ֆարմանյանի խոսքերով՝ «Մենք անցել ենք այդ ճանապարհը, եւ որոշ դասեր պետք է քաղենք: Ցանկը, որ նայում ենք՝ տպավորություն է, որ ապրում ենք վաստակավորների երկրում»:
Ըստ Սամվել Ֆարմանյանի, երբ մարդիկ որեւէ շնորհքով մարդու տեսնում են փողոցում, գլուխ են խոնարհում, դա ավելի մեծ հարգանք է, քան որեւէ մեդալ ու կոչում:
Պատգամավորն ասաց, որ այդքան շատ կոչումներն էլ արժեզրկում են այդ ամենը:
Կարդացեք նաև
Հռիփսիմե ՋԵԲԵՋՅԱՆ
