ԱԺ-ում երկրորդ ընթերցմամբ քննարկվեց Ավելացված հարկի մասին օրենքի նախագիծը, որով առաջարկվում է ԵՏՄ-ից ֆիզիկական անձանց ավտոմեքենաներ ներկրելու հարկը հանել:
Նախագծի հեղինակ Վարդան Այվազյանն ասաց, որ նախագիծը որեւէ փոփոխություն չի կրել, որովհետեւ գրավոր առաջարկություններ չեն եղել: Միայն մեկ բանավոր առաջարկություն է եղել, որը այլ օրենքի կարգավորման խնդիր է:
Հրանտ Բագրատյանն առաջարկել էր, որ նախագծում անպայման ամրագրվի, թե քանի մեքենա կարող են մարդիկ ներկրել՝ առանց ԱԱՀ-ի, բացի այդ, 2015-ին գանձված հարկերի վերադարձման հետ կապված հարց էր բարձրացրել:
Ուստի նա դժգոհեց. «Ես գրավոր առաջարկություն չեմ ներկայացրել, բայց մարդավարի ձեզ բան ենք ասել, ասում ենք՝ լուծեք մինչեւ այդ լուծված ԱԱՀ-ի հարցը, ապրանքային քանակի հարցը լուծեք: Ինչի՞ եք այլանդակում օրենքը: Ինչ ասում ենք, կարաս զապիս անես՝ չե՛մ գրելու»:
Կարդացեք նաև
Նախագիծը դրվեց քվեարկության եւ ընդունվեց գրեթե միաձայն՝ 103 կողմ, 1 ձեռնպահ: Ձեռնպահ քվեարկել էր Հրանտ Բագրատյանը:
Հռիփսիմե ՋԵԲԵՋՅԱՆ
