Այսօր կառավարության նիստից հետո էներգետիկայի և բնական պարաշների նախարար Լևոն Յոլյանը լրագրողներին ասաց, որ Հայաստանն ու Ռուսաստանը շարունակում են բանակցել Հայաստանին մատակարարվող գազի գնի հարցում եւ հույս հայտնեց, որ մինչև ապրիլի մեկը բանակցությունները կավարտվեն:
Հարցին, թե ճի՞շտ են տեղեկությունները, որ բանակցություններն ընթանում են 120 դոլար գնի շուրջ, նախարարը հստակ պատասխան չտվեց՝ նշելով, որ չի կարող մանրամասնել բանակցային գործընթացը: Իսկ թե որքանով կարող է նվազել գազի սակագինը, պատասխանեց. «Ես ասացի՝ բանակցություններ են ընթանում, թողեք թող ավարտվեն, նոր արդյունքները կներկայացնենք»: Հարցին, թե Հայաստանի իշխանությունները քննարկո՞ւմ են սպառողի համար գազի գնի էժանացման հարցը, Լևոն Յոլյանը պատասխանեց, որ բանակցություններն ընթանում են, եթե հնարավորություն լինի, բնակիչների համար էլ իջեցում կլինի:
Նախարարն անդրադարձավ Հայաստանի տարածքով Վրաստանին իրանական գազ մատակարարելու հայտարարություններին, ասաց, որ հարցը քննարկվել է ու շարունակելու է քննարկվել: «Ապրիլի 11-13-ը նախատեսվում է չորս երկրների նախարարների մակարդակով հանդիպում Վրաստանում: Գնում են բավականին ակտիվ աշխատանքներ՝ Հայաստանի տարածքն ավելի ակտիվ ներգրավելու էներգետիկ ծրագրերում»,- ասաց նա: Եթե Հայաստանը դառնա տարանցիկ երկիր, ըստ Յոլյանի, օգուտներ կունենա. «Պարզ չէ՞, տրանզիտի գումարներ են հաստատվելու, բյուջեն փող է մտնելու»:
Վրաստանին Հայաստանի տարածքով գազ մատակարարելու հարցը, Լևոն Յոլյանի խոսքով, նախորդ տարեվերջին Հայաստանում կայացած քառակողմ հանդիպման ժամանակ էր քննարկվել, որին մասնակցել էին Հայաստանի, Ռուսաստանի, Վրաստանի ու Իրանի ներկայացուցիչները: Ավելի վաղ, սակայն, նախկին նախարար Երվանդ Զախարյանը լրագրողների հարցին ի պատասխան՝ ասել էր, թե նման հարց հայաստանյան քառակողմ բանակցությունների ժամանակ չեն քննարկվել:
Կարդացեք նաև
Մանրամասները շտեսանյութում
Նելլի ԲԱԲԱՅԱՆ
