Այս պահին կառավարության շենքի մոտ բողոքի ակցիա են անում Կոնդի բնակիչները: Նրանք պահանջում են, որպեսզի վարչապետ Հովիկ Աբրահամյանն իրենց ընդունի: Բնակիչները փորձեցին փակել Տիգրան Մեծ փողոցը, սակայն ոստիկանները պատ կազմեցին եւ թույլ չտվեցին:
Aravot.am-ի հետ զրույցում Կոնդի բնակիչներից Անահիտ Ղազարյանը պատմեց, որ նրանք 2004 թվականից, երբ իրենց բնակարանները որպես հանրային գերակա շահ քանդել են, 250 ընտանիք մինչ օրս չեն ստացել իրենց խոստացած բնակարանները: Մանրամասն՝ տեսանյութում:
Անահիտ Ղազարյանի պատմելով՝ դեռեւս 2012թ. պետք է ստանային բնակարանները, բայց ամեն անգամ, երբ իրենք խնդիրը բարձրացնում են, կառավարության համապատասխան պաշտոնյաները խնդիրը վրայից ցրում են: Մանրամասն՝ տեսանյութում:
Կարդացեք նաև
Բնակիչներից մեկի՝ Ալլա Համբարձումյանը Aravot.am-ին պատմեց, որ վարչապետի խորհրդական Հայկ Դավթյանը Կոնդի բնակիչների հետ հանդիպումների ժամանակ ասել է. «Փող չկա, մենք պատասխանատու չենք: Խելացի լինեիք՝ գումարը վերցնեիք, բնակարանային պայմանագիր չկնքեիք: Դատարան էլ դիմեք, մենք պատասխանատու չենք»: Մանրամասն՝ տեսանյութում:
Կոնդեցիների ներկայացմամբ՝ ներկայումս իրենց քանդված տների տեղում շինարարություն է գնում եւ իրենք վստահ են, որ այդ նորակառույցից իրենց բնակարան չի հասնելու, քանի որ բնակարաններն այս պահին ավելի մեծ մակերեսներով են կառուցվում, քան իրենց համար նախատեսել էին: Բնակիչներն ասում են, թե մոտ 10 տարի է՝ իրենք վարձով են բնակվում եւ շատ հաճախ խնդիրներ են ունենում:
Այսօր կառավարության շենքի մոտ բողոքի ակցիա էին անում նաեւ Բյուզանդի եւ Հյուսիսային պողոտայի բնակիչները: Նրանց պատմելով՝ իրենց տարածքը ձեռք է բերել Սամվել Մայրապետյանը եւ տարիներ առաջ չնչին փոխհատուցում է տվել՝ 1 քմ-ն 1000 դոլարի փոխարեն ընդամենը 270 դոլար, եւ նրանցից շատերը չեն կարողացել բնակարան ձեռք բերել: Ուստի պահանջում են գումարային տարբերությունը փոխհատուցել:
Այսօր բողոքի ակցիա էին անում նաեւ հաշմանդամ օդաչուները, պահանջելով վերականգնել իրենց խախտված իրավունքները՝ կրկին գումարային փոխհատուցում:
Նելլի ԲԱԲԱՅԱՆ
