ԱԺ ընդդիմադիր պատգամավոր, ՎՍԴՀԿ ատենապետ Լյուդմիլա Սարգսյանի համար անակնկալ չէ այն, որ նախկին արտգործնախարար Վարդան Օսկանյանը կուսակցություն է ստեղծում եւ 2017-ի խորհրդարանական ընտրությունների մասով բավական լուրջ ակնկալիքներ ունի:
«Սպասվում էր, այդ մասին էլ բազմաթիվ հրապարակումներ եղան»,- Aravot.am-ի հետ զրույցում ասաց տիկին Սարգսյանը`հավելելով, որ ՎՍԴՀԿ-ն ողջունում է ցանկացած նորաստեղծ կուսակցության մուտքը քաղաքական դաշտ. «Վերջին մեկ տարվա ընթացքում երեք նոր քաղաքական ուժ ձեւավորվեց`երիտասարդ լիդերներով: Կարծում եմ, նրանց փորձառությունն ավելի մեծ չէ, քան Վարդան Օսկանյանինը: Ես բավական դրական կարծիք ունեմ պարոն Օսկանյանի մասին`զուսպ, հավասարակշիռ, հաշվարկային մարդ է: Ես նրան գնահատում եմ եւ որպես պետական, եւ որպես քաղաքական գործիչ: Այն, որ պարոն Օսկանյանի կողմից ստեղծվելիք կուսակցության շուրջ բավական մեծ աղմուկ է բարձրացել, արդեն իսկ խոսում է այն մասին, որ քաղաքական դաշտում որոշակի խուճապ կա եւ կլինեն որոշակի վերադասավորումներ: Որոշակի ներքին հաշվարկները կվերահաշվարկվեն: Վարդան Օսկանյանն իր քաղաքական հայտով ասում է, որ լուրջ գործընթացների մեջ է մտնում: Ես կարծում եմ, որ նա լուրջ դերակատարում կունենա ընտրական գործընթացներում»:
Ակնկալիքների մասով էլ նկատեց, որ միայն Վարդան Օսկանյանը չէ, բոլորը լուրջ ակնկալիքներ ունեն, բայց, բնական է, որ ոչ բոլորի մոտ է իրենց պատկերացումներով ստացվելու:
Aravot.am-ի դիտարկմանը, որ Վարդան Օսկանյանը 2008-ի իր հայտնի ելույթով, ինչպես Նիկոլ Փաշինյանն է ասում «մահվան դատավճիռներ էր հրապարակում», մինչդեռ նա եւ իր մտերիմները փորձում են ներկայացնել, որ ամենաքիչը Վարդան Օսկանյանը մեղք ունի այդ ամենում, իսկ տիկին Սարգսյանն, որն այն ժամանակ Վարդան Օսկանյանի հետ բարիկադի տարբեր կողմերում էր, այժմ դրվատանքով է խոսում նրա մասին, տիկին Սարգսյանը պատասխանեց. «Այո, այն ժամանակ մենք պարոն Օսկանյանի հետ եղել ենք բարիկադի տարբեր կողմերում: Եվ ոչ միայն ես եմ եղել բարիկադի տարբեր կողմերում: Բայց եթե բարիկադի`իմ հատվածի քաղաքական ուժերը պատրաստակամ են Վարդան Օսկանյանի հետ համագործակցության… Ինչ վերաբերվում է իմ կարծիքին`ես մեկ բան կասեմ`Վարդան Օսկանյանն այդ ժամանակ դժբախտություն է ունեցել իշխանություն լինելու: Չեմ բացառում, որ այդ իրավիճակներում, նա ինչ-որ տեղ թիրախ դարձավ»:
Կարդացեք նաև
Այլ մանրամասները` տեսանյութում
Նելլի ԳՐԻԳՈՐՅԱՆ
