Վերաքննիչ քրեական դատարանում մարտի 16-ին տեղի ունեցավ Գեւորգ Սաֆարյանի գործով վերաքննիչ բողոքի քննությունը՝ խափանման միջոցը փոխելու վերաբերյալ:
Գեւորգ Սաֆարյանի պաշտպան Տիգրան Հայրապետյանը լրագրողներին հայտնեց, որ դատարանը մերժել է բողոքը. «Դատավորի դեմքին, որ նայում ես, կամ որ ներկայացնում ես հիմնավորումները դատարանի կարեկցանքով հասկանում ես, որ ինքը համաձայն է ներկայացված բոլոր հիմնավորումների հետ: Հիմք ընդհանրապես չկա, որովհետեւ մի կողմից այն արարքի մեջ, որ նա մեղադրվում է, չնչին արարք է, եւ նվազագույն պատիժը մեղմ է: Այս պարագայում կալանավորում է եղել, պետք է գրավ կիրառվի: Մյուս կողմից, մենք ունենք 11 հեղինակավոր անձանց երաշխիք՝ Ազգային ժողովի պատգամավորներ, Հայաստանի Հանրապետությունում հայտնի մարդիկ, որոնք երաշխավորել են պատշաճ վարքագիծը:
Ընդհանրապես հիմնավորված չէ, որ Գեւորգ Սաֆարյանը նախաքննական ընթացքի վրա ինչ-որ ձեւով կազդի, այն պարագայում, երբ ամեն ինչ հրապարակված է գաղտնիք չկա: Զարմանալի է, որ քննիչը չէր եկել, դատախազը չէր եկել, ոչ էլ իրենք առարկել էին: Այսինքն՝ նախագահող դատավորը հիմք չուներ ընդհանրապես մերժելու: Այսինքն՝ եթե գրավոր առարկություններ չեն եղել, բանավոր առարկություններ չկան, բայց դատավորը կարեկցական հայացքով ընթերցում է, հասկանում ես, որ համաձայն չէ, բայց դատական ակտը այսպես է: Ցավալի է, որ դատարանները չեն կարողանում իրենց բարձրության վրա գտնվել եւ արդար դատական ակտեր կայացնել»:
Տիգրան Հայրապետյանը կարծում է, որ գործը նախաքննության է ուղարկվել, քանի որ դատախազը հասկացել էր, որ նման կոպիտ սխալներով հնարավոր չէ մեղադրանքը պաշտպանել, հետ է ուղարկել, որ ավելի հիմնավոր ապացույցներ լինեն. «Հավանաբար, նոր վկաներ կհայտնվեն, հավանաբար, կգան մարդիկ, որոնք ոստիկաններ չեն եւ ցուցմունք կտան, որ իրենք եղել են այդ օրը պատահական տեսել են, թե ինչպես է այդ օրը Գեւորգը հարվածել Գեղամ Խաչատրյանին: Գործում կային այսպիսի անձինք, բայց քննիչը այսպիսի անձանց ցուցմունքները համարել էր, որ քանի որ այնքան էլ չի կարող մեղադրանքի հիմքում դնել, քննիչը առերեսում չէր կատարել: Հիմա, հավանաբար, այդ անձինք կառերեսվեն»:
Կարդացեք նաև
Տիգրան Հայրապետյանը համարում է, որ գործում ճչացող հակափաստարկներ կան: Նա վստահություն հայտնեց, որ եթե գործը գնա դատարան, ապա մի քանի նիստից հետո դատարանները ստիպված ազատ են արձակելու: Վերջում նա հավելեց. «Գեւորգ փոխանցեց, որ ինքը ընկճված չի, շարունակում է պայքարել, հավատում է, որ մի օր հաղթանակ կլինի»:
Ամի ՉԻՉԱԿՅԱՆ
