Այսօր ԱԺ նիստում Տնտեսական մրցակցության պաշտպանության հանձնաժողովի 2016-ի գործունեության ծրագրի քննարկման ժամանակ ՀԱԿ խմբակցության պատգամավոր Նիկոլ Փաշինյանը Տնտեսական հարցերի հանձնաժողովի նախագահ Վարդան Այվազյանից հետաքրքրվեց, թե ի՞նչ է կատարվում Հայաստանի բենզինի շուկայում:
Ինչո՞ւ ԵՏՄ անդամ մեր երկրում բենզինն ավելի թանկ է, քան Վրաստանում:
Նա նաեւ հարցրեց. «Կա վարկած, որ քանի որ ԱԺ բազմաթիվ պատգամավորներ, իշխանության ներկայացուցիչներ, կառավարության անդամներ գազալցակայաններ ունեն, որտեղ մեքենաները լիցքավորվում են, նրանց ձեռնտու չի, որ բենզինի գինը ցածր լինի: Իրենց գազալցակայանները չեն աշխատի եւ «արդար քրտինքով» վաստակած գումարները հօդս կցնդեն: Իմիջիայլոց, հետաքրքիր է, անձամբ դուք գազալցակայան ունե՞ք, թե՞ ոչ»:
Վարդան Այվազյանը պատասխանեց. «Ի դժբախտություն ինձ՝ չունեմ: Ինձ ո՞ւր է տենց բախտ: Հիմա մենակ ընդդիմությանն են տալիս գազալցակայանների տեղերը, էդ էլ ասեմ: Տենց վարկած էլ, կա, էլի, որտեղ ձեր վարկածը, ըտեղ էլ իմ վարկածը»:
Կարդացեք նաև
Ինչ վերաբերում է Վրաստանի գներին,Վարդան Այվազյանը պատասխանեց, որ այնտեղ արդյունաբերությանը վառելիքը թանկ են տալիս, բնակչությանը՝ էժան. «Այո, Վրաստանում ռեգուլյար բենզինն արժի 280-290 դրամ: Ես չգիտեմ, մերոնք ՌԴ-ի՞ց են ներկրում բենզին, ես էդ բիզնեսի մեջ չկամ, չգիտեմ»:
Նիկոլ Փաշինյանը չէր կարողանում զսպել ծիծաղը. «Հետաքրքիր է, պարզվում է՝ խորհրդարանի տնտեսական հարցերի հանձնաժողովի նախագահը պիտի էդ բիզնեսում լինի, որ հարցին տիրապետի: Ստեղից կարո՞ղ ենք ենթադրել, որ այն հարցերի մասին, որ տենց պինդ, համոզված խոսում եք, էդ բոլոր տեղերում ունեք բիզնես: Ախր պարո՛ն Այվազյան, դուք հանձնաժողովի նախագահ, իշխանության ներկայացուցիչ, հարց ենք տալիս՝ ասում եք՝ ես էդ հարցերի պատասխանները չգիտեմ: Բա մենք էլ գիտենք դուք՝ իշխանության ներկայացուցիչներդ գիտեք, պարզապես մեզ չեք ասում, որ տրամադրություններս չընկնի: Էն էլ պարզվում ա՝ դուք էլ չգիտեք: Էս երկրում փաստորեն ոչ մեկը ոչ մի բանից խաբար չի: Շաբոյանը համարյա չգիտի, դուք ընդհանրապես չգիտեք, բա ո՞ւմ դիմենք, որ իմանա»:
Այվազյանն էլ պատասխանեց. «Հենա, դուք գիտեք, էլի: Ըստ ձեր հավաստի աղբյուրների, ամեն ինչի մասին գիտեք, ամեն ինչի մեջ էլ պրոֆեսոր եք: Ինչ վերաբերում ա իմ բիզնեսներին, թերթերը մեկ ա գրում են՝ հիմք ունենան, թե չունենան»:
«Պրոֆեսորը դո՛ւ ես»,- բղավեց Փաշինյանը: Նրանց հաշտեցրեց Էդուարդ Շարմազանովը:
Հռիփսիմե ՋԵԲԵՋՅԱՆ
