Մարտի 15-ին Հայաստանի Ամերիկյան Համալսարանում կայացավ «Հայաստանի պատանեկան նվաճումներ» կազմակերպության «Ձեռնարկատիրական եւ քաղաքացիական կրթություն» ծրագրի՝ աշակերտական հասարակական կազմակերպությունների (ԱՀԿ) դրամաշնորհների տրամադրման միջոցառումը:
Ինչպես Aravot.am-ի հետ զրուցում նշեց «Հայաստանի պատանեկան նվաճումներ» կազմակերպության գործադիր տնօրեն Արմինե Հովհաննիսյանը, «Ձեռնարկատիրական եւ քաղաքացիական կրթություն Հայաստանի Հանրապետության խոցելի համայնքների դպրոցների աշակերտների համար» դասընթացի շրջանակում դրամաշնորհ են ստացել 12 աշակերտական հասարակական կազմակերպություններ: Հայաստանի բոլոր մարզերից մրցույթին մասնակցել էին ավելի քանի 150 դպրոցների աշակերտական կազմակերպություններ:
Ծրագրի արդյունքում ստացած տնտեսագիտական եւ ֆինանսական ոլորտի գիտելիքները աշակերտները կիրառել են գործնականում՝ հիմնելով գործարար ընկերություններ: Նրանք ծանոթացել են նաեւ կորպորատիվ սոցիալական պատասխանատվության հիմունքներին: «Որպես լավ գործարարներ, դուք սովորել եք արդար, ազնիվ ու խելացի փող աշխատել: Նաեւ սովորել եք, որ փողը այդքան էլ էական արժեք չէ, կարեւոր է այն, թե հետո ինչ ես անում այդ փողի հետ: Սովորել եք՝ ինչ ասել է կորպորատիվ սոցիալական պատասխանատվություն: Ի դեպ, այդ գաղափարի ներմուծման հիմնադիր հայրը ՎիվաՍել-ՄՏՍ-ի գլխավոր տնօրեն Ռալֆ Յիրիկյանն է»,-փաստեց տիկին Հովհաննիսյանը:
Կարդացեք նաև
Հավելենք, որ ստացված դրամաշնորհներով աշակերտական հ/կ-ները հանրային եւ համայնքային խնդիրներ կլուծեն՝ սկսած դպրոցական գրադարանի ստեղծումից, վերջացրած դպրոցի մոտակայքում նստարանների տեղադրումով, կամրջի վերանորոգմամբ, մարզադահլիճի թարմացմամբ ու միջմշակութային երկխոսությամբ:
Ծրագիրը ֆինանսավորվում է JHM բարեգործական հիմնադրամի եւ HSBS բանկի կողմից, «Հայաստանի պատանեկան նվաճումներ» կազմակերպության գործընկերն է նաեւ ՎիվաՍել-ՄՏՍ-ը:
Գոհար ՀԱԿՈԲՅԱՆ
