Այսօր Տնտեսական մրցակցության պաշտպանության հանձնաժողովի նախագահ Արտակ Շաբոյանը հանձնաժողովի 2016-ի գործունեության ծրագիրը ներկայացրեց:
ՀԱԿ խմբակցության պատգամավոր Նիկոլ Փաշինյանը նրան խնդրեց բացատրել, թե Հայաստանի բենզինի, վառելիքի շուկայում ինչ է կատարվում. «2013-ին ՀՀ-ն ու ՌԴ-ն կնքեցին համաձայնագրերի փաթեթ, որտեղ նշվում էր, որ ՌԴ-ն նավթամթերքը արտոնյալ պայմաններով է տալու, արտահանման մաքսատուրք չի վճարվելու: Դրանից հետո մտանք ԵՏՄ, դարձանք մեկ ընդհանուր մաքսային տարածք: Բայց հիմա իրողություն ունենք, որ Վրաստանում բենզինն ավելի էժան է, օրինակ, ռեգուլյար տիպի բենզինը ՀՀ-ում 390 դրամ է, Վրաստանում՝ մոտ 250 դրամի կարգի: Ստացվում է, որ մենք արտոնյալ տարածքում արտոնյալ պայմաններում տուրքերից եւ մաքսային խոչընդոտներից զերծ ենք, բայց Վրաստանը, որը բոլորովին ուրիշ միջավայրում է գործում, ավելի էժան բենզին է ստանում»:
Արտակ Շաբոյանը պատասխանեց, որ ՀՀ-ում բենզինի գները 480 դրամից 390 դրամի են հասել, նվազել են. «Հայկական դրամի փոխարժեքը մեծ ազդեցություն ունի, այս երկու տարիների ընթացքում դրամն արժեզրկվել է: Եթե դրամի փոխարժեքի ազդեցությունը հանենք, միայն դոլարային արտահայտությամբ նայենք վաճառքի գները, կտեսնենք, որ վերջին երկու տարիների ընթացքում գինը նվազել է 32 տոկոսով: Վաճառքի գների նվազումը համահունչ է ձեռքբերման գների նվազմանը: Մենք ներկրող ընկերությունների վարքագծում չարաշահում չենք տեսնում»:
Շաբոյանն ասաց, որ տրանսպորտի ծախսն էլ ազդեցություն թողնում. «Բավականին բարձր են սակագները, որով վրացական Փոթի նավահանգստից Այրում հասցնելու համար է գանձվում: 1 տոննա բենզին ներկրելու հարկային բեռը ՀՀ-ում շատ ավելի մեծ է, քան Վրաստանում: Հետո պայմանավորված է ձեռքբերման գներով: Վրաստանը ՀՀ-ի նման նույն մատակարարներից է բենզին ներկրում, բայց տեղեկություն կա, որ Ադրբեջանից ու Թուրքմենստանից բավականին ցածր գներով բենզին է բերում»:
Կարդացեք նաև
Հռիփսիմե ՋԵԲԵՋՅԱՆ
