ԱԺ-ում այսօր երկրորդ ընթերցմամբ քննարկվեց «Ժառանգություն» խմբակցության պատգամավորներ Զարուհի Փոստանջյանի, Ռուբեն Հակոբյանի, Թեւան Պողոսյանի հեղինակած՝ «ԱԺ կանոնակարգ օրենքում» փոփոխություններ եւ լրացումներ կատարելու մասին նախագիծը, որով առաջարկվում է ուրիշի փոխարեն քվեարկող պատգամավորներին կարգազանց որակել:
Զարուհի Փոստանջյանն ասաց, որ այս 9 տարիների ընթացքում, ինչ պատգամավոր է, սա միակ օրենսդրական նախաձեռնությունն է, որ դրական եզրակացություն է ստացել եւ մտել է ԱԺ նիստերի օրակարգ. «Չէի պատկերացնում, որ իմ կողմից հեղինակած առաջին օրենքը, որը պետք է ընդունվի, կվերաբերվեր ԱԺ կարգազանց պատգամավորներին: Կարծում էի՝ ավելի լուրջ դերակատարություն պետք է ունենամ ԱԺ-ում, բայց հիմա այդպես է ստացվել: Լավ է, որ բոլորի համար այս օրինագիծն ընդունելի է: Կարծում եմ, պատժամիջոցներն ավելի խիստ կլինեին, բայց, այնուամենայնիվ, որ ուրիշի փոխարեն քվեարկած պատգամավորները օրինազանց կհամարվեն, դա առաջընթաց է»:
ԱԺ էթիկայի հանձնաժողովի նախագահ Խոսրով Հարությունյանն ասաց, որ միայն ուրիշի փոխարեն քվեարկելը չպետք է համարվի կարգազանցություն. «Օրինակ, որեւէ մեկին հանիրավի զրկել քվեարկելու հնարավորությունից, դա պակաս կարգազանցություն չէ: Մենք պետք է անդրադառնանք լիագումար նիստերի բնականոն գործընթացին խոչընդոտող բոլոր հնարավորություններին եւ սահմանենք դրանց համար պատժամիջոցներ՝ ընդհուպ զրկելով նրանց ձայնից ոչ թե մեկ ժամ, մեկ օր, այլ՝ տեւական ժամանակ»:
Կարդացեք նաև
Հիշեցնենք, որ գազի պայմանագրի քննարկման ժամանակ Զարուհի Փոստանջյանն էր հավաքել պատգամավորների քարտերը՝ թույլ չտալով նրանց քվեարկել, ուստի Խոսրով Հարությունյանի ակնարկը, որ դա պակաս կարգազանցություն չէ եւ պետք է պատժել՝ ընդհուպ զրկելով ձայնից, վերաբերում էր հենց տիկին Փոստանջյանին:
ՕԵԿ խմբակցության ղեկավար Հեղինե Բիշարյանն էլ ողջունեց, որ կանայք, ի դեմս Փոստանջյանի, կոռեկտության շրջանակներում են փորձում պահել տղամարդկանց. «Պատգամավոր տղամարդկանց կողմից ռեպլիկներ ենք լսում, որն անընդունելի է»:
Էդուարդ Շարմազանովն էլ կոչ արեց պատգամավորների գռեհիկ ելույթներին գռեհկությամբ չպատասխանել:
Հռիփսիմե ՋԵԲԵՋՅԱՆ
