Այսօր ԱԺ նիստում շարունակվում է Ավելացված արժեքի մասին ՀՀ օրենքում փոփոխություններ եւ լրացումներ կատարելու մասին նախագծի քննարկումը, որը ծափերով ընդունվեց ընդդիմության կողմից: Հիշեցնենք, որ նախագծով նախատեսվում է ԵՏՄ տարածքից ներկրվող ավտոմեքենաների ԱԱՀ-ն հանել: Բայց այն դեպքում, երբ ներկրողը ֆիզիկական անձ է եւ ներկրում է տարեկան ընդամենը 1 մեքենա:
ՀԱԿ խմբակցության պատգամավոր Հրանտ Բագրատյանը դեռ երեկ ծափահարել էր իշխանությանը այս նախագծի համար եւ ցանկություն հայտնել նույնիսկ լինել համահեղինակ այս նախագծի:
Այսօր պարոն Բագրատյանն ասաց, որ այս նախագիծը ունի թերություններ, չի միանա. «Գործ չունեմ, չեմ միանա, բայց կողմ կքվեարկեմ: Եթե ինձ ժամանակին կանչեիք, ավելի գրագետ կձեւակերպեինք: Երբ 1 մեքենա են բերում, ԱԱՀ չի գանձվում, իսկ եթե բերեն 3-4 մեքենա: Նախագծում մեքենաների համար ապրանքային քանակ գրված չի, ուրեմն ես կարող եմ մեկն էլ բերել, 4 մեքենա էլ բերել: Եվ հետո, ինչպե՞ս պետք է վարվենք այն գումարի հետ, որը գանձվել է արդեն քաղաքացիներից: Ես առաջարկում եմ ձեւակերպել դա պետական պարտք եւ փոխհատուցվի պետական արժեթղթերով գոնե, մինչեւ կգա օրը եւ ժամը եւ պետությունը կմարի»:
Կարդացեք նաև
ՀԱԿ խմբակցության պատգամավոր Գագիկ Ջհանգիրյանն էլ ասաց, որ փոխհատուցման հարցը կարելի է նաեւ դատական նախադեպով կարգավորել. «Պարզ է, որ 2015-ի բյուջեն ծախսել են, կերել են, հիմա էլ փող ոչ մեկը չի տա: Դրա համար ես առաջարկում եմ հնարավորություն տանք կառավարությանը, որ ինքն իր որոշմամբ սահմանի փոխհատուցման կարգը»:
Կառավարության ներկայացուցիչ Սուրեն Կարայանը վստահեցրեց, որ կառավարությունը մինչ այս ապօրինի չի գանձել ԵՏՄ-ից ֆիզիկական անձանց կողմից ներկրվող մեքենաների ԱԱՀ-ն. «Այդ դրույթը ժամանակավոր բնույթ ուներ ի սկզբանե, որ պետք է գանձվեր ԱԱՀ: Եթե մենք չհարկեինք ներկրումը, անհավասար պայմաններ կստեղծվեր այս ոլորտում գործունեություն իրականացնող անձանց մոտ: Մեզ ժամանակ էր պետք, որ բանակցություններ վարեինք ԵՏՄ անդամ երկրների հետ, որ առանձնահատուկ մոտեցումներ սահմանվեին ՀՀ-ի համար»:
Հռիփսիմե ՋԵԲԵՋՅԱՆ
