Քիչ առաջ ավարտվեց Վենետիկի հանձնաժողովի համազեկուցողների ու ԵԱՀԿ/ԺՀՄԻԳ-ի ներկայացուցիչների հանդիպումը ՀԱԿ խմբակցության ներկայացուցիչների հետ: Նրանք, հիշեցնենք, Հայաստան են ժամանել մարտի 14-ին: Երեկ ԸՕ նոր նախագիծը քննարկել են Նիկոլ Փաշինյանի եւ Էդմոն Մարուքյանի հետ: Այսօր նախատեսված են հանդիպումներ հիմնականում խորհրդարանական խմբակցությունների ներկայացուցիչների հետ: Հանդիպումներ կլինեն նաեւ ՀԱԿ խմբակցության պատգամավոր Հրանտ Բագրատյանի, «Ժառանգություն» խմբակցության պատգամավոր Ռուբեն Հակոբյանի եւ անկախ պատգամավոր Խաչատուր Քոքոբելյանի հետ:
Առավոտյան Վենետիկի հանձնաժողովի համազեկուցողների ու ԵԱՀԿ/ԺՀՄԻԳ-ի ներկայացուցիչները հանդիպել են նաեւ «Ժառանգություն» կուսակցության ներկայացուցիչներ Արմեն Մարտիրոսյանի եւ Զարուհի Փոստանջյանի հետ:
Հանդիպումից հետո ՀԱԿ խմբակցության ղեկավար Լեւոն Զուրաբյանն ասաց, որ Վենետիկի հանձնաժողովի համազեկուցողներին ու ԵԱՀԿ/ԺՀՄԻԳ-ի ներկայացուցիչներին իրենք ներկայացրել են իրենց հիմնական առաջարկները, որոնց շուրջ, իր գնահատմամբ, որոշակի կոնսոլիդացիա նկատելի է: Դրանք են`ընտրություններից հետո ցուցակների հրապարակում, ընտրացուցակների իրականում մաքրում`Հայաստանում բնակվող ընտրողների եւ դրսում գտնվող ընտրողների`ընդդիմության, իշխանության եւ քաղաքացիական հասարակության համատեղ հանձնաժողովով, տեսախցիկների տեղադրում բոլոր տեղամասերում, մատների թանաքոտում եւ ռեյտինգային ցուցակների մերժում: Ի դեպ, այս սկզբունքների մասին խոսել են նաեւ Արմեն Մարտիրոսյանն ու Զարուհի Փոստանջյանը:
Կարդացեք նաև
«Առանց այս պահանջների իրականացման, Հայաստանում պահպանվելու է այն ընտրակեղծարարության համակարգը, որը տարիներ շարունակ մերժում է ժողովրդի կամարտահայտությունը»,- ասաց Լեւոն Զուրաբյանը:
Թե ի՞նչ արձագանքներ են եղել Վենետիկի հանձնաժողովի համազեկուցողների ու ԵԱՀԿ/ԺՀՄԻԳ-ի ներկայացուցիչների կողմից, Լեւոն Զուրաբյանը ձեռնպահ մնաց ամբողջությամբ բացահայտել: Միայն ասաց, որ տպավորիչ էր այն ուշադրությունն ու խորաթափանցությունը, որով այս փորձագետներն ուսումնասիրում են իրենց փաստարկները. «Զգացվում է, որ ֆորմալ մոտեցում չկա»:
Այլ մանրամասները` տեսանյութում
Նելլի ԳՐԻԳՈՐՅԱՆ
