2016թ.-ի Ֆրանկոֆոնիայի օրերի շրջանակներում Հայաստանում Ֆրանսիայի դեսպանությունն այսօր կազմակերպեց «Վերանայել քաղաքը՝ միասին ավելի լավ ապրելու համար» խորագրով համաժողովը, որի մասնակիցները քննարկում են զարգացող քաղաքներում առկա խնդիրները եւ դրանց լուծման ուղիները:
Հայաստանում Ֆրանսիայի արտակարգ եւ լիազոր դեսպան Ժան-Ֆրանսուա Շարպանտիեն նկատեց, որ մոլորակի բնակչության 50 տոկոսը և զարգացած երկրների բնակչության 70 տոկոսն ապրում են քաղաքներում. «Ներկայում քաղաքային բնակչության մեծ աճ է գրանցվում, ինչը կարող է բացասական ազդեցություն ունենալ` հատկապես տնտեսական եւ բնապահպանական առումով: Հատկապես մեծ քաղաքներում միջավայրի աղտոտումը մեծ խնդիր է: Ինչ վերաբերում է Երեւանին, ապա այստեղ է կուտակված երկրի բնակչության մեծ մասը: Օրինակ, գազի ծախսը ծանր է նստում երկրի բյուջեի եւ տնտեսական իրավիճակի վրա: Համարվում է, որ Երեւանի եւ հայկական մյուս քաղաքների բնակիչներն ամենազգայունն են էներգիայի եւ տրանսպորտի ծախսերի ավելացման առումով: Նաեւ տրանսպորտային համակարգը թարմացնելու կարիք կա: Պետությունը եւ քաղաքացիական հասարակությունը գիտակցում են, որ պետք է վերանայել ապագայի քաղաքը: Այն պետք է լինի ածխածնից զերծ»:
Քաղաքաշինության նախարար Նարեկ Սարգսյանն էլ լրագրողների հետ զրույցում առանձնացրեց Էներգախնայողության, քաղաքային տրանսպորտի կազմակերպման, աղբահանության խնդիրները. «Այսօր կարեւրովում է նոր տեխնոլոգիաների կիրառումը, որպեսզի էներգախնայողությունը լիարժեք լինի»:
Ինչ վերաբերում է Երեւանյան շենքերի սեյսմակայունությանը, նախարարի խոսքով. «Վերջին տարիներին կառուցված շենքերը սեյսմակայուն են: Խորհրդային տարիներին կառուցվածներն արդեն մաշված են եւ սեյսմիկ վտանգ են ներկայացնում: Ընդհանուր առմամբ, մեր սեյսմիկ նորմերը լիարժեք համապատասխանում են միջազգային չափանիշներին, դրանք փորձաքննություն են անցել տարբեր երկրների կողմից»:
Կարդացեք նաև
Հավելենք, որ համաժողովի շրջանակում ֆրանսիացի մասնագետները հայ գործընկերներին կներկայացնեն քաղաքների տնտեսական, սոցիալական, բնապահպանական և մշակութային զարգացման ոլորտներում իրենց ներդրած փորձը:
Լուիզա ՍՈՒՔԻԱՍՅԱՆ
