«Եթե պատգամավորը թերացել է կամ շեղվում է իր ստանձնած պարտականություններից ու պարտավորություններից, քաղաքացին հնարավորություն չունի իրեն պատժելու։ Իսկ այդպիսի մարդկանց՝ կարիերիստներին, պատիժ է, երբ նրանց պաշտոնից հանում ես. պաշտոնանկությունն ամենամեծ պատիժն է»,- «Հայելի» ակումբում, անդրադառնալով նոր Ընտրական օրենսգրքի նախագծին, ասաց Գերագույն խորհրդի նախկին պատգամավոր Ազատ Արշակյանը։
Նա կարծում է, որ Ընտրական օրենսգրքում նման կետ ներառելու անհրաժեշտություն կա. «Միակ ձեւը հետկանչի իրավունքն է։ Թեկուզ 1 միլիոն կամ 3 միլիոն ստորագրություն գրեիք, մարդահամար անեինք, մենք ձեզ հետ կանչեինք»։
Այս օրենսգրքի հեղինակներն, ըստ Ազատ Արշակյանի, իտալական գործադուլ են անում. «Իրենք տառակերությամբ հանձնարարությունը կատարել են, որը ստացել են ինչ-որ պալիտբյուրոյից։ Ակնհայտ է, որ մասնագետները կատարել են ցուցումները եւ դրանով ձախողում են օրենքը։ Այսինքն՝ ժողովրդավարական երկրում, ժողովրդավարական թափանցիկ իշխանափոխություն անելու համար ընտրություն կատարելն անհնար է»։
Աշոտ ԻՍՐԱԵԼՅԱՆ
