Համացանցում տարածված է մի տեսանյութ, որտեղ շտապօգնության բժիշկը վիրավորում է Սիրահարների այգում վատացած պապիկին: «Այ մարդ, ստեղ հազար հատ մարդ կա, հո դու խայտառակ չե՞ս: Էս էրեխեն քեզնից ի՞նչ ա սովորելու: Չե՞ս գալի հմի հիվանդանոց…. հավեսդ չունեմ…»,- ասում է բժիշկն ու լքում տարածքը` թողնելով անօգնական քաղաքացուն:
https://www.youtube.com/watch?v=dLSsaSpyvwk
Aravot.am-ը կատարվածի վերաբերյալ մեկնաբանություն խնդրեց Երեւանի քաղաքապետարանի «Շտապբուժօգնություն» ՓԲԸ-ի տնօրեն Թագուհի Ստեփանյանից: Նա դատապարտեց բժշկի պահելաձեւը, նաեւ շեշտեց, որ բժիշկը ամեն դեպքում առաջարկել է հիվանդանոց տեղափոխել պապիկին, իսկ նա հրաժարվել է: « Հիվանդին միայն մեկ բժիշկ չի սպասարկել, երեք անգամ կանչ է տրվել, երեւի թե անցորդներից, երեք անգամ էլ բրիգադան ժամանել է, իսկ հիվանդը կտրուկ հրաժարվել է, որից հետո ստորագրել է կանչի թերթիկում, որ հրաժարվում է հոսպիտալացումից; Ընդհանրապես մոտեցումը սխալ է եղել, հիվանդին եւս որեւէ ձեւով մեղադրելը նույնպես սխալ է, քանի որ հիվանդ պապիկ է, որը միգուցե չի ցանկացել հիվանդանոց տեղափոխվել: Նաեւ մենք հավատարիմ ենք այն մոտեցմանը, որ հիվանդը միշտ ճիշտ է: Թե կողքից ինչպե՞ս են դրդել, ինչպես են նկարել, դա էլ մեկ այլ թեմա է, բայց չէ՞ որ բժիշկը մասնագիտական առումով առաջարկել է հիվանդին հիվանդանոց տեղափոխել, իհարկե, կրկնում եմ, որ սխալ է իր խոսելաոճը, ինչի համար նա կպատժվի: Ամեն դեպքում նույն հիվանդի մոտ երեք անգամ շտապօգնություն է գնացել, այդքան ծախս է արվել, բայց նա հրաժարվել է»,-ասաց տիկին Ստեփանյանը:
Գոհար ՀԱԿՈԲՅԱՆ
