2016 թ. մարտի 12-ին ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում, նախագահությամբ՝ Ռ. Մխիթարյանի, հրապարակվեց ՀՔԱ Վանաձորի գրասենյակի կողմից ՀՀ Հատուկ քննչական ծառայության դեմ ներկայացված բողոքի քննության արդյունքում կայացված որոշումը, որով Դատարանը մերժեց Կազմակերպության կողմից ներկայացված բողոքը՝ դրանով իսկ իրավաչափ համարելով ՀՀ Հատուկ քննչական ծառայության գործողությունները:
Հիշեցնենք, որ ՀՔԱ Վանաձորի գրասենյակը 2015 թ. դեկտեմբերի 10-ին ՀՀ Հատուկ քննչական ծառայություն ներկայացված հաղորդմամբ կասկած էր հայտնել, որ 2015 թ. դեկտեմբերի 6-ի հանրաքվեի ժամանակ 60 տոկոս և ավելի մասնակցություն գրանցած տեղամասերում եղել է կամ լցոնում կամ բացակա անձանց փոխարեն քվեարկություն և խնդրել էր միջոցներ ձեռնարկել այդ փաստերը պարզելու, հանցանք կատարած անձանց բացահայտելու և պատասխանատվության ենթարկելու ուղղությամբ: ՀՀ Հատուկ քննչական ծառայությունը, սակայն, գրությամբ պատասխանել էր, որ դիմումում ներկայացվել են հիմնազուրկ ենթադրություններ, դրանք կոնկրետ նախապատրաստվող կամ արդեն կատարված հանցագործության մասին որևէ տեղեկություն չեն պարունակում, որն անհրաժեշտ պայման է ներկայացված դիմումը հանցագործության մասին հաղորդում համարելու համար: Ուստի՝ Կազմակերպության ներկայացրած դիմումի հիման վրա քրեադատավարական բնույթի որոշում չի կայացվել:
Հելսինկյան Քաղաքացիական Ասամբլեայի Վանաձորի գրասենյակ
