Ղրղզըստանի ԱԳՆ-ն դեռևս չգիտի կա՞ն արդյոք ղրղզ քաղաքացիներ, որոնք տուժել են 2016թ. մարտի 13-ին՝ Անկարայում տեղի ունեցած ահաբեկչական գործողություների հետևանքով։ Այս մասին տեղեկացնում է ղրղզական Zanoza լրատվական կայքը։
Անկարայում տեղի ունեցած ահաբեկչական ակտի վերաբերյալ հայտարարություն է տարածել Ղրղզըստանի ԱԳՆ-ն, որում մասնավորապես ասվում է. «Այս պահի դրությամբ Ղրղզըստանի ԱԳՆ-ն տեղեկություններ չունի կա՞ն արդյոք տուժածների շարքերում Ղրղզըստանի քաղաքացիներ, որովհետև Թուրքիայի իրավասու կառույցները տեղեկություններ չեն տրամադրում զոհերի վերաբերյալ։ Նախարարությունը տեղեկությունների է սպասում Թուրքիայի Հանրապետության Ներքին գործերի նախարարության արտաքին կապերի բաժնից»։
Հիշեցնենք, որ 2016թ. մարտի 13-ի երեկոյան Թուրքիայի մայրաքաղաք Անկարայում տեղի էր ունեցել պայթյուն, որի հետևանքով զոհվել 34, վիրավորվել է 125 մարդ։
