1999թ. ապրիլին Լոռու մարզի Շնող գյուղում ծնված Ա. Հ.-ն 2015թ. ապրիլի 25-ին «Արմենիա» բժշկական կենտրոնում երեխա է ունեցել: Հաջորդ օրը ոստիկանության աշխատակիցներն այցելել են անչափահաս աղջկան եւ հարցրել, թե ո՞վ է երեխայի հայրը: Նա տվել է խորթ հոր անունը, ով Տավուշի մարզի Վերին Կարմիրաղբյուր գյուղի բնակիչ է: 2015թ. հոկտեմբերի 16-ին Ա. Հ.-ն ՀՀ քրեական օրենսգրքի 333 հոդվածի 2-րդ մասի 1-ին կետով որպես մեղադրյալ է ներգրավվել այն բանի համար,որ նա գիտակցելով իր տրամադրած տեղեկատվության կեղծ լինելը, ծանր հանցագործության մասին կատարել է սուտ մատնություն, 2015թ. ապրիլի 26-ին ոստիկանության Երեւան քաղաքի վարչության Մաշտոցի բաժնում հաղորդում է տվել այն մասին, որ 2014թ. հունվարից մինչեւ դեկտեմբեր ամիսը Վերին Կարմիրաղբյուրում իր խորթ հայրը, տեղյակ լինելով, որ իր 16 տարին չի լրացել, սեռական հարաբերություն է ունեցել իր հետ:
Տավուշի մարզի առաջին ատյանի դատարանում Ա. Հ-ին իրեն մեղավոր է ճանաչել, հրաժարվել է ցուցմունք տալ: Սակայն նախաքննության ժամանակ ցուցմունք է տվել, որ ծննդաբերելուց հետո ինքը շփոթված է եղել, չի իմացել,թե ով է իր երեխայի նյութական խնդիրները հոգալու, դիտավորյալ նշել է խորթ հոր անունը, որպեսզի նա պարտավորվի խնամել երեխային: Հետագայում աղջիկը զղջացել է իր կատարածի համար: Տավուշի մարզի առաջին ատյանի դատավոր Ռաֆիկ Մելքոնյանը Ա. Հ.-ի պատիժն ու պատասխանատվությունը մեղմացնող հանգամանքներ է համարել նրա կողմից ի սկզբանե խոստովանական ցուցմունքներով հանցագործության բացահայտմանն աջակցելը, ինչպես նաեւ հանցագործություն կատարելու պահին նրա անչափահաս լինելը:
Ըստ «Դատալեքս» դատական տեղեկատվական համակարգի՝ 2015թ. դեկտեմբերի 23-ին Իջեւանում Տավուշի մարզի առաջին ատյանի դատարանի դատավոր Ռ. Մելքոնյանը վճռել է Ա. Հ.-ին մեղավոր ճանաչել ՀՀ քրեական օրենսգրքի 333 հոդվածի 2-րդ մասի 1-ին կետով եւ դատապարտել 3 ամիս ժամկետով ազատազրկման: Դատավորը վճռել է նշանակված պատիժը պայմանականորեն չկիրառել եւ սահմանել 1 տարի ժամկետով փորձաշրջան: Քրեական գործով մեղադրողը վճռաբեկ բողոք է ներկայացրել, որով խնդրել է բեկանել վերոհիշյալ դատավճիռը եւ քրեական գործն ուղարկել Երեւան քաղաքի Աջափնյակ եւ Դավթաշեն վարչական շրջանների ընդհանուր իրավասության առաջին ատյանի դատարան՝ նոր քննության: Ներկայումս քրեական գործերով ՀՀ վերաքննիչ դատարանում նշված բողոքի քննությունը շարունակվում է, հերթական նիստը նշանակված է մարտի 31-ին:
Կարդացեք նաև
Լուսանկարը՝ vistanews.ru-ի
Ոսկան ՍԱՐԳՍՅԱՆ
