ՌԴ նախագահի մամուլի քարտուղար Դմիտրի Պեսկովի «Լեռնային Ղարաբաղի հակամարտության լուծումը կողմերի ձեռքին է, այլ ոչ թե միջազգային միջնորդների» հայտարարությունը ուղերձ էր Արեւմուտքին, Հայաստանին եւ Ադրբեջանին:
Քաղաքական վերլուծաբան Ստյոպա Սաֆարյանի մեկնաբանմամբ, Ռուսաստանը փորձում է Արեւմուտքին ցույց տալ, որ իրենք Մինսկի խմբի հետ են, ընդունում են Մինսկի խմբի մոտեցումները՝ հակամարտությունը պետք է լուծվի կողմերի միջոցով, կողմերի հանգուցալուծմամբ. «Ուզում են հանգստացնել Արեւմուտքին, որ Ռուսաստանը սեպարատ քայլեր չի ձեռնարկում ԼՂՀ խնդրի կարգավորման ուղղությամբ: Այս հայտարարությունը հատկապես կապ ունի օրերս Թբիլիսիում Մինսկի համանախագահների՝ ԼՂՀ խնդրի կարգավորման վերաբերյալ քննարկման հետ, թերեւս սա կարեւոր է այն առումով, որ ցույց են տալիս, որ ՌԴ-ն չի խախտում պայմանավորվածությունները»:
Ուղերձի երկրորդ հասցեատիրոջը՝ Հայաստանին, ըստ Ստյոպա Սաֆարյանի, Ռուսաստանը նույնպես փորձեց հանգստացնել. «Հայաստանում կան կասկածներ, որ ՌԴ-ն կարող է գործարքի գնալ Ադրբեջանի հետ հանուն նոր աշխարհաքաղաքական իրավիճակների ու շահերի: ՌԴ-ն փորձում է հանգստացնել, որ ի վնաս Հայաստանի չի լինի եւ նաեւ արդարացում էր Բաքվի առջեւ, որ եթե Բաքուն ուզում է խնդիրը լուծվի, իսկ դրա մասին օրերս հայտարարել է Իլհամ Ալիեւը ՝ ասելով, որ ստատուս քվոն պետք է փոխվի, ապա քաղաքական լուծումը Ռուսաստանի ձեռքում չէ, այլ Բաքվի, Երեւանի ու Ստեփանակերտի ձեռքին»:
Արփինե ՍԻՄՈՆՅԱՆ
