Այսօր Ընտրական օրենսգրքի նախագծի շուրջ արդարադատության նախարարության կազմակերպած հանրային քննարկման ժամանակ կառավարության աշխատակազմի ղեկավար-նախարար Դավիթ Հարությունյանին ԲՀԿ խմբակցության ղեկավար Նաիրա Զոհրաբյանը հարցրեց. «Ասենք, ընտրողը չի ցանկանում ԲՀԿ-ի ռեյտինգային ցուցակից օգտվել որեւէ մեկին նշել, բայց համամասնական ցուցակին կողմ է, ընտրում է ԲՀԿ-ին, ռեյտինգայինում չի տեսնում իր համար ընկալելի կերպար: Հիմա նրա քվեաթերթիկը համարվում է անվավե՞ր, եթե չի նշում ռեյտինգայինում»:
Դավիթ Հարությունյանը նախ հորդորեց այլեւս ռեյտինգային տերմինը չօգտագործել, իրենց առաջարկածը ռեյտինգային չէ. «Մեկը սխալմամբ օգտագործել է, որից հետո այդ սխալ հասկացությունը տարածում է գտել: Ռեյտինգայինի պարագայում ընտրում են ռեյտինգով, այսինքն՝ առաջին տեղում նախընտրում եմ այս թեկնածուին, երկրորդ տեղում՝ այս: Սա է ռեյտինգայինը, իսկ այն համակարգը, որը ձեզ առաջարկվել է, կոչվում է համամասնական ընտրություն՝ բաց ցուցակներով: Եթե ընտրողը խաչ է քաշել թեկնածուների վրա, բայց համամասնականին քվեարկել է, բնականաբար, որեւէ թեկնածուի օգտին ձայն չի հաշվվելու, բայց այդ քվեաթերթիկը պատշաճ քվեաթերթիկ է՝ կուսակցության օգտին»:
Նաիրա Զոհրաբյանի համար նաեւ անհասկանալի էր՝ ամեն ընտրատարածքում մի ռեյտինգային ցուցակ, ինչո՞ւ չի կարող մի անձը ներկայացվել մի քանի ընտրատարածքների ռեյտինգային ցուցակում. «Օրինակ, ես կուզենայի բոլոր 13 ընտրատարածքներում էլ ռեյտինգայինով անպայման դնել, ես դնելու եմ: Ինչո՞ւ երկու տեղ հնարավորություն չպետք է ունենա թեկնածուները դնել ռեյտինգայինով իրենց թեկնածությունը»:
Դավիթ Հարությունյանը պատասխանեց, որ համամասնական ցուցակի եռյակում կարող է լինել թեկնածուն:
Կարդացեք նաև
Հռիփսիմե ՋԵԲԵՋՅԱՆ
