«ԶԼՄ-ների եւ վստահված անձանց 8 հոգի ներկայությունը ընտրատեղամասում էդ ո՞վ է որոշելու, էդ հանձնաժողովի նախագահը Դունյա Միյատովի՞չն է լինելու, որ ինքը պիտի որոշի՝ այս լրատվամիջոցն իրավունք ունի լինելու, մյուսը՝ ոչ: Կամ ի՞նչ է նշանակում հերթականությամբ մտնել, հացի հե՞րթ է, ի՞նչ է, ով առաջինը եկավ գրանցվեց, ուրեմն նա էլ ունենալու է առավելություն: Սա կատեգորիկ անընդունելի դրույթ է՝ ԶԼՄ-ների դեմ, որեւէ հանձնաժողովի նախագահ չի կարող որոշել առաջնահերթությունները»,- այսօր Ընտրական օրենսգրքի նախագծի շուրջ արդարադատության նախարարության կազմակերպած հանրային քննարկման ժամանակ կառավարության աշխատակազմի ղեկավար-նախարար Դավիթ Հարությունյանին այս հարցն ուղղեց ԲՀԿ խմբակցության ղեկավար Նաիրա Զոհրաբյանը:
Դավիթ Հարությունյանը պատասխանեց. «Մենք դեմ ենք եղել, որ թեկնածուներն ունենան իրենց վստահված անձինք, կողմ ենք եղել, որ կուսակցություններն ունենան, բայց, ցավոք, լիբերալության պատճառով բազում թեկնածուներ իրենց ներկայացուցիչներին ուղարկում են ընտրատեղամաս՝ դիտորդների, ԶԼՄ ներկայացուցիչների կարգավիճակով: Բացում ես մի էլեկտրոնային ԶԼՄ, բաժանում ես լրագրողի վկայականները եւ ընտրատեղամասերում ունենում ենք շատ ավելի շատ մարդ, քան թույլատրելի է ընտրական գործընթացի համար»:
Դավիթ Հարությունյանն ասաց, որ պատրաստ են քննարկել ցանկացած ողջամիտ առաջարկ: Կան երկրներ, որտեղ ընտրությունները լուսաբանելու համար լրագրողները պետք է հավատարմագրվեն եւ կարողանան ապացուցել, որ իսկապես նյութեր են հրապարակում, իսկապես լրագրողներ են:
«Սա քաղաքական կոնսենսուսի խնդիր է: Պետք է գտնենք եղանակ, որ թույլ չտանք մեծ բազմություն եւ չխոչընդոտենք ԶԼՄ-ներին»,- ասաց Դավիթ Հարությունյանը:
Կարդացեք նաև
Հռիփսիմե ՋԵԲԵՋՅԱՆ
