Ռուսաստանցի ռազմական փորձագետ Ալեքսանդր Խրամչիխինի՝ «Ռազմարդյունաբերական սուրհանդակ» վերլուծական թերթում նախօրեին հրապարակած Հայաստանի Զինված ուժերի ներուժի վերաբերյալ «Ֆորպոստը՝ հարցերով» սկանդալային հոդվածը փոթորիկ է առաջացրել հայկական քաղաքական եւ մեդիա դաշտում։
Ալեքսանդր Խրամչիխինը հայկական կողմի արձագանքը յուր աշխատանքի եւ անձի նկատմամբ «շատ նյարդային» գնահատեց։ «Չեմ հասկանում նման նյարդային գնահատականների եւ արձագանքի պատճառը։ «Ռազմարդյունաբերական սուրհանդակն» անցյալ տարեվերջից հոդվածաշար է հրապարակում հետխորհրդային շրջանի երկրների զինված ուժերի վերաբերյալ։ Մեկ շաբաթից նման մի հոդված էլ կտպագրվի Ադրբեջանի զինված ուժերի մասին»,- ասաց նա՝ հավելելով, որ հրապարակած տվյալներում ոչ մի գաղտնիք չկա։
Փորձագետը, որը, ի դեպ, մասնագիտությամբ ֆիզիկոս է ու բանակում էլ չի ծառայել, վստահեցրեց, որ հոդվածը օգտագործել է միայն բաց աղբյուրներ։ «Այստեղ ոչ մի կրիմինալ չկա։ Ի՞նչ գաղտնի տվյալների մասին է խոսքը, երբ Ադրբեջանն ու Հայաստանը Սովորական սպառազինությունների մասին պայմանագրով ամեն տարի ներկայացնում են ՁՈւ-երի մասին տվյալներ։ Ավելին՝ կարծում եմ, նրանք միմյանց հետ ևս փոխանակվում են այդ տվյալներով»,- հավելեց նա։
Հետաքրքրական է, որ «Ռազմարդյունաբերական սուրհանդակ» թերթի հիմնադիրն է 1990 թվականին Բաքվից Մոսկվա տեղափոխված ազգությամբ ադրբեջանցի Իգոր Աշուրբեյլին։
Կարդացեք նաև
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
