«Ընտրության արդյունքում եթե որեւէ կուսակցություն չի ստացել 53 մանդատ, ժամանակ է տրվում, որ ձեւավորվեն կոալիցիաներ: Պետք է ներկայացնեն վարչապետի թեկնածուին եւ կոալիցիայի մեջ մտնող կուսակցություններն ունենան 50+1 տոկոս քվե: Եթե դա չեն ապահովում, անցկացվում է երկրորդ փուլ: Ընդ որում, ԸՕ-ով նախատեսել ենք, որ երկրորդ փուլում կարող են ձեւավորվել նոր դաշինքներ: Երկրորդ փուլի արդյունքներով որեւէ կուսակցություն պիտի ստանա մանդատների 50+1 տոկոս քվե, որը բոնուսային տարբերակով կստացվի 54: Խոսքը միայն մեծամասնությանը տրամադրվող բոնուսների մասին չէ: Եթե որեւէ կուսակցություն, դաշինք կամ կոալիցիան կազմող կուսակցությունները կունենան ձայների 2/3-ը, ապա փոքրամասնության բոնուսն է գործելու, նրանց ձայները կավելացվեն, կդառնան 1/3: Այսինքն, եւ մեծամասնության, եւ փոքրամասնության համար նախատեսված են բոնուսներ»,- այսօր Ընտրական օրենսգրքի նախագծի շուրջ հանրային քննարկման ժամանակ արդարադատության նախարար Արփինե Հովհաննիսյանը նախագծում տեղ գտած փոփոխությունները ներկայացրեց մասնակիցներին:
Ընտրողների ստորագրած ցուցակները հրապարակելու ընդդիմության պահանջի հետ կապված՝ Արփինե Հովհաննիսյանն ասաց, որ եւ դիտորդները, վստահված անձինք իրավունք ունեն ծանոթանալ այդ ցուցակներին:
Ինչպես բացատրեց նախարարը, որպեսզի ԱԺ-ում կոալիցիաները չլինեն շատ խայտաբղետ եւ քաղաքական համակարգում եւս կայունություն լինի, 3 կուսակցությունների արգելապատնեշ կա: Եթե այդ երեք կուսակցություններն ունեն 53 մանդատ, այդ դեպքում կարող ենք ասել, որ ԱԺ է ձեւավորվել:
Հռիփսիմե ՋԵԲԵՋՅԱՆ
