Ոստիկանության Արաբկիրի բաժնից ազատ արձակվեցին 13 երիտասարդ ակտիվիստները:
Aravot.am-ի հետ զրույցում բերման ենթարկված ակտիվիստներից Կարպիս Փաշոյանն ասաց, որ նրանք բոլորը հրաժարվել են ստորագրել որեւէ փաստաթղթի տակ: Ինչ վերաբերում է բերման ենթարկելու հիմքին՝ Վարչական իրավախախտումների մասին օրենսգրքի 182-րդ հոդվածին՝ ոստիկանության ծառայողի օրինական պահանջին չենթարկվելը, Կարպիս Փաշոյանն անհեթեթություն է համարում, եւ այս մասով կազմված արձանագրության տակ էլ չեն ստորագրել: Արձանագրությունը, ինչպես ասաց ակտիվիստը, ուղարկվելու է դատարան, որից հետո պարզ կլինի՝ կտուգանվե՞ն ակտիվիստները, թե՝ ոչ:
«Անհիմն մեղադրանք է: Մենք սահմանադրական մեր իրավունքից ելնելով՝ ակցիա էինք անում, իրենք՝ ոստիկաններն եկան եւ խանգարեցին մեր ակցիան»,-ասաց Կարպիս Փաշոյանը:
Ակտիվիստի պատմելով՝ ոստիկանության բաժնում նրա փաստաբանը, որը շնչառական խնդիրներ ունի, խնդրել էր որպեսզի իրավապահ մարմինների ներկայացուցիչները չծխեին. «Բայց նրանք միտումնավոր շարունակում էին ծխել: Արհեստական լարվածություն կար նրանց վերաբերմունքում, հատկապես փաստաբանի նկատմամբ:
Կարդացեք նաև
Իմ փաստաբանը կին էր եւ նրան դուրս հրավիրեցին անձնական զրույցի ժամանակ, ինչի իրավունքը չունեին: Ես պնդեցի, որ առանց փաստաբանի չեմ խոսի: Հետո նրանք ստիպում էին վերնաշապիկս հանեմ, հանեցի, հետո ասացին՝ շապիկս հանեմ, առանց շապիկս հանելու էլ, անզեն աչքով երեւում էր, որ ես շապիկիս տակ ոչինչ չկա»:
Իսկ թե ի՞նչ էին փնտրում ոստիկանները, մեր այս հարցին ի պատասխան Փաշոյանն ասաց. «Սուր կտրող, ծակող գործիքներ, թմրանյութ, անհեթեթություն»:
Հիշեցնենք, որ այսօր Ազգային ժողովի դարպասների մոտ մի խումբ երիտասարդներ ակցիա էին անում «Ազատություն քաղբանտարկյալներին» խորագրով: Այս ակցիայի ժամանակ ոստիկանները պահանջել են ցած իջնել ԱԺ-ի ճաղավանդակներից եւ արձակել իրենց իսկ կապանքները, որով նրանք իրենց ձեռքերն ամրացրել էին ճաղավանդակներին, ի նշան բողոքի:
«Մենք շարունակելու ենք քաղբանտարկյալների համար պայքարը՝ բոլոր հնարավոր միջոցներով, պայքարելու ենք, որպեսզի քաղբանտարկյալներ չլինեն եւ ազատ արձակվի Գեւորգ Սաֆարյանն, ինչպես ազատ արձակվեց Վարդգես Գասպարին»,-ասաց Կարպիս Փաշոյանը:
Հիշեցնենք, որ այսօր ոստիկանության բաժին տարված ակցիայի մասնակիցներից էին նաեւ Լուսինե Հայրապետյանը, Սիփան Փաշինյանը, Միքայել Նազարյանը, Արտակ Գեւորգյանը, Տիգրան Մազմանյանը եւ այլք։
Նելլի ԲԱԲԱՅԱՆ
