«Իրանը մեր բարեկամ երկիրն է, Վրաստանը պետական այցով ձգտել է, որպեսզի օգտվի իրանական գազից: ՌԴ-ն որոշակի սահմանափակումներ մտցրեց Վրաստանում: Վրաստանը ձգտում է Իրանից գազ ստանալ եւ շատ կարեւոր է այստեղ, որ տարանցիկ երկիր լինի Հայաստանը: Գազամուղն ունենք, հնարավորությունները կան: Մենք պետք է նախանձախնդիր լինենք: Բայց ամեն ինչ իրա գինն ունի»,- այսօր «Հայելի» ակումբում ասաց ՀՀԿ պատգամավոր Վարդան Այվազյանը:
ԲՀԿ անդամ, տնտեսագետ Վարդան Բոստանջյանի խոսքերով՝ ինչ կա-չկա ՀՀ-ում, բոլորը վաճառել ենք, մերկ նստած ենք:
Վարդան Այվազյանը հակադարձեց. «Վրաստանո՞ւմ ինչը չի վաճառված»:
Ըստ Բոստանջյանի, այնտեղ կառավարման համակարգն արդյունավետ է աշխատում ավելի, քան ՀՀ-ում: Նա դիմեց Վարդան Այվազյանին՝ քննադատելով, թե՝ «Պետք է կառավարման արդյունավետությունն այստեղ բարձրացնենք, ոչ թե խեղճուկրակ նայենք ՌԴ-ին, թե ինչ է անում կամ ինչ չի անում: Էսօր մենք հարեւան ունենք՝ Իրանի պես մեծ երկիր: Ինչո՞ւ չենք մտնում բանակցությունների մեջ: Մտածում ենք մենակ ՀՀԿ-ն շե՞ֆ լինի: Բաժանել եք երկիրը՝ մերոնք են, ձերոնք են: Մենք 1.5 մլրդ չինացի լինեինք, ուրեմն իրար կուտեինք: Էս ի՜նչ լավ ա, բաժանվել եք մի 100 հոգով լավ ուտում-խմում եք, մնացած ամբողջ ազգին թողել եք մի կողմ, համարում եք սա թշնամի, սա՝ յուրային: Բոլորը մտածում են տորթին մոտիկ լինեն, բա կարելի՞ ա տենց բան»:
Կարդացեք նաև
Վարդան Այվազյանի խոսքերով՝ գնացեք ձեր համար բարգավաճեք, ինձ հետ ի՞նչ գործ ունեք: Բոստանջյանն էլ պատասխանեց. «Ամեն ինչ վերցրել եք, «Ժառանգությանը» փչացրիք, էն մեկին փչացրիք, սաղին փչացրիք»:
«Փչացող ապրանք են, պիտի չփչանան»,- ասաց Այվազյանը:
Վարդան Այվազյանը վստահեցրեց, որ իրանական գազը Հայաստանով Վրաստան տեղափոխելու համար բանակցություններ են գնում: Վարդան Բոստանջյանն առաջարկում էր ռեալ ու ձեռնտու գործարքների գնալ. «Կարող է Իրանը մեզ գործարքով մեզ մատակարարի անվճար գազ, մենք էլ այլ գործառույթ իր փոխարեն վերցնենք մեր վրա»: Այվազյանը հակադարձեց. «Ես 55 տարեկան եմ, ձրի բան չեմ տեսել: Ձրի պանիրը լինում է թակարդում»:
Հռիփսիմե ՋԵԲԵՋՅԱՆ
