Ավան եւ Նոր Նորք վարչական շրջանների ընդհանուր իրավասության առաջին ատյանի դատարանում դատավոր Դավիթ Հարությունյանը հրապարակեց Արմենուհի Գրիգորյանի գործով դատական ակտը:
Դատարանը Արմենուհի Գրիգորյանին ճանաչեց մեղավոր եւ նրա նկատմամբ որպես պատիժ նշանակեց տուգանք՝ 500 հազար դրամի չափով: Մեղադրող Ռուզաննա Ասատրյանը հայտարարել էր, որ Արմենուհի Գրիգորյանի նկատմամբ անհրաժեշտ է կիրառել ազատազրկումից մեղմ պատիժ, եւ միջնորդել՝ որպես պատիժ սահմանել տուգանք 500 հազար դրամի չափով:
Հիշեցնենք՝ Արմենուհի Գրիգորյանին մեղադրանք է առաջադրվել այն բանի համար, որ նա 2015 թվականի դեկտեմբերի 6-ին տեղի ունեցած սահմանադրական փոփոխությունների հանրաքվեի ընթացքում, լինելով 2/11 ընտրատեղամասի հանձնաժողովի անդամ, այլ անձի փոխարեն քվեարկելու ուղղակի դիտավորությամբ, ընտրողների մատյանում հաշվառված Արայիկ Մանուկյանի տվյալների դիմաց գիտակցաբար գրառել է մտացածին անձնագրային կեղծ տվյալներ, որոնց դիմաց ստորագրել է եւ կնքել:
Այնուհետեւ նույն մատյանում հաշվառված Կարինե Մանուկյանի տվյալների դիմաց լրացրել է մտացածին անձնագրային տվյալներ՝ նպատակ ունենալով քվեարկել նշված երկու անձանց փոխարեն, սակայն իր կամքից անկախ հանգամանքներում հանցագործությունը ավարտին չի հասցրել: Նշված դեպքը հայտնաբերվել եւ կանխվել է հանձնաժողովի անդամ, ՀԱԿ խմբակցության ներկայացուցիչ Հասմիկ Պետրոսյանը:
Կարդացեք նաև
Ամի ՉԻՉԱԿՅԱՆ
